Pangkat ‘Datuk’ berekat ari sukung rayat – Datuk Willie Mongin

KUCHING: Sapit Menteri Pengawa Bekebun enggau Komiditi, Willie Mongin entara 355 iku penerima Darjah Mahkota Wilayah beserimbai enggau Hari Wilayah Persekutuan 2021.

Darjah Kebesaran, Bintang enggau Pingat Wilayah Persekutuan udah diberi Duli Yang Maha Mulia Seri Paduka Baginda Yang di-Pertuan Agong, Al-Sultan Abdullah Ri’ayatuddin Al-Mustafa Billah Shah Ibni Almarhum Sultan Haji Ahmad Shah Al-Musta’in Billah, ditu sehari tu.

Willie ti mega Kaban Parlimen Puncak Borneo madahka gela tu ngarika peranak ba sitak Puncak Borneo laban seruran nyukung iya ngelama tu.

Ku Willie, pangkat ‘Datuk’ tu berekat sukung ari rayat kelebih agi peranak ba sitak Puncak Borneo.

“Puji Tuhan, aku berasai gaga pengudah nerima berita tu beserimbai enggau Pengerami Ngintu Hari Wilayah Persekutuan 2021 ti nerima gela Datuk.

“Pia mega, aku deka meri besai terima kasih ngagai Duli Yang Maha Mulia Seri Paduka Baginda Yang di-Pertuan Agong (YDPA) laban udah meri gela tu.

“Nadai jaku ulih dirintai mandangka pengaga ati nerima gela tu. Daulat Tuanku!,” ku Willie.

Suara Sarawak