Peranak Selangau gaga nerima bantu kereban berumah

SELANGAU: Tiga buah rumah panjai sitak Parlimen Selangau ditu udah nerima bantu kereban berumah ari Perintah Sarawak.

Bansa kereban bantu berumah diterima genap rumah panjai nya mega bebida nitihka peminta sida ti diberi nengah pengari Dun Tamin.

Nitihka penerang, peranak 19 pintu Rumah Uta di Batu 72, Jalai Sibu Bintulu nerima musik seraya peranak Rumah Albert Lapok Entalang di Sungai Pelugau, Balingian (15 pintu) enggau Rumah Miggi di Batu 21, Jalai Bukit Tanggi di Sibu (18 pintu) bela nerima atap spandek.

Ngarika peranak rumah panjai ke nerima bantu, Tuai Rumah Albert meri besai terima kasih ngagai Perintah Sarawak dibaruh pegai Gempung Parti Sarawak (GPS) laban udah nangkup peminta sida.

Ku iya, belanja sida serumah nyeleti enggau ngentak baru rumah nyau berasai lempung agi diatu kelebih agi rega atap spandek diatu umbas pemar.

“Aku bisi amat pengandal enggau pechayaka perintah enggau pengari rayat sitak tu ulih gawaka rayat.

“Sida semampai siruka nasip rayat sereta bagas gawa enggau mantu rayat ti begunaka bantu kelebih agi peranak menua pesisir baka kami ditu,” ku Albert.

TERIMA KASIH… Tuai Rumah Albert gaga nerima bantu kereban berumah.