LAGU diberi nama Suluku Apai Orang deka merindang mensia mayuh nengah channel Youtube urung pukul 8 malam, 15 Disember 2021.
Dara bajik, Alycia Nyaie, 30, peranak asal ari Lubok Bukut, Balingian udah dipilih sereta diberi pengandal nyadaka lagu berentak remix tauka ranchak nya.
Penengkebang leka lagu Suluku Apai Orang, Unja Juni, kedua bali nama Gerama Nyepit madahka diri teulihka runding ngaga leka lagu nya lebuh muka rumah asap, ba jalai Lubok Bukut, Balingian .
“Runding nya tau datai pia aja, engka nyau pemuaska bedagang sereta meda ulah sekeda bala pengusung ti ngelawa rumah asap tauka sida ti bejalai mansa.
“Dia aku ngerintaika leka lagu dalam ati din sebedau diangkat lalu ditulis ba bup. Udah nya diserenih, ngiga jaku ti engkeman agi didinga sereta manding,” ku iya lebuh dirandau Suara Sarawak tadi.
Tembu ngaga leka lagu, baru Unja Juni minta saup siku penanyi tebilang kitai Iban, Tony Engkabi ngaga tiun lalu seduai bekerejasama dataika lagu nya tembu.
“Baka ni pun cherita seduai betemu, nanggam pengerindu enggau pasal kaul seduai sama mih kitai ninga ba lagu ti keterubah dikeluar nengah channel Youtube ila.
“Nya alai, anang enda ingat semaya kitai, sama muka Youtube pukul 8 malam kena 15 Disember tu.
“Sama mih kitai nyukung lagu Iban ti mayuh meri jaku ajar enggau lalau sereta ke malin kitai ba pengidup besehari sehari,” ku iya nyimpul randau.
Ke penerang, lagu Suluku Apai Orang dikeluar di baruh serikat Kaban Music Production (KMP) lalu udah ngerikod video ba Tasik Permai Sibu.
