Allen Charlie: Nengkebang Dunya Mansang

NIAT ati Allen Charlie nengkebang ruai tauka dikumbai rebak kemaya hari blog: Leka Main Iban semina deka ngerembaika pengaya jaku Iban ngambika enda punas ngapa diseruyut jeman.

Kenu ku Allen, blog tu nyadi sebagi ari pelasar alai iya bekunsika chebik penemu ngenang diri ti chukup pemerinsa begigaka penyanding penemu lebuh iya bejalaika pansik silik bekaul enggau main asal Iban.

Niri Tuat Ruai

Kebuah pia ku Allen laban tau dikumbai nadai penyanding penemu ti nyata enggau nyemetak ngenang siti-siti main asal kitai Iban dalam dunya internet ti mungkur dunya mansang tu.

“Terima kasih besai diberi ngagai aya Gregory Nyanggau Mawar ti enda nemu leju nyaut tanya aku ari suba nyentukka sehari tu.

ANGKUN… Allen Charlie

“Pia mega ngagai aya Rintai Edmond ti enda nemu lembau nguluka tudah aku sereta ngaturka pejalai betemu enggau sida ke tuai ti landik amai sereta dalam penemu dalam pengawa asal kitai bansa,” ku Allen.

Identiti Bansa

Ku penemu Allen, main Asal Iban tu siti ari identiti kitai bansa ti ngasuh kitai jauh ngelui ari sukut litaricha enggau pengaya jaku ari raban bansa bukai.

Jarang bansa bukai ke enda muji raban bansa kitai Iban laban ngembuan pengelandik ngena sereta ngaga leka jaku ke setimbal dalam main kena betundi.

Main asal tu mega suah dikena kitai bansa dalam pengawa begawai enggau pengawa rama sereta pengerami baka melah pinang tauka pengerami bukai ba rumah panjai.

PANTUN PERANSANG… Roslina Lulut seduai Gabriel Guret nyadakan pantun peransang ba mua mayuh ba rambau Malam Budaya diatur di Dewan Stephen Kalong Ningkan, Betong beserimbai enggau Pengawa Seminar Budaya Iban 2015.

Pengaya Jaku Iban

Ku Allen, kitai mega suah didinga kitai muji pemanah enggau pengaya jaku kitai nya nadai lebih agi ari bala ribai ke bisi ngadu pansik dalam main enggau adat asal bansa Iban ari kelia ngagai diatu.

“Enti kitai kala macha sekeda bup dalam jaku English ke ditulis bala sida Prof Derek Freeman, Prof Clifford Sather, Malcolm MacDonald, Ling-Roth enggau sekeda scholar ke bukai.

“Kitai tetap temegah ati ninga puji sida pasal jaku enggau pengaya main sereta adat asal kitai Iban lalu Freeman kala madah bala kitai Iban tu ‘Master of Language’.

Ku Allen nibak jaku Freeman, kita Iban pandai ngena jaku, ba jalai jaku, ngaga jaku, ngemanahka jaku, landik milih sereta ngeripih leka jaku sereta mega ngembuan mayuh bengkah main ke ngena tusun jaku setimbal munyi.

KELULU… Kumang enggau Keling suah disebut dalam leka ensera Iban ngayanka penyiru enggau pengekul basa kitai neladan penyikar enggau pengering ati sida di Panggau Libau.

“Tu baka jaku ke dikena dalam ‘poems’ enggau ‘prose’ dalam jaku bansa Ribai. Nya nanda ke pemanah jaku kitai seikas enggau jaku bala ribai.”

Main Asal

Kitai Iban ngembuan mayuh bansa main asal benyawa ke ngena tusun jaku ke setimbal sama semunyi dalam mayuh bengkah Pengap, Renung, Ganu, Sanggai, Pantun, Timang Jalung, Timang Kenyalang sereta Timang bukai.

“Tu nyengkaum Sugi, Dungai, Jawang, Ramban, Pelandai, Sabak, Pelian enggau sekeda main asal bukai.

“Main asal bukai ke enda ngena nyawa nya baka Sampi, Biau, Ai Ansah, Geliga, Entelah enggau utai bukai,” ku Allen nerang silik.

PENGAYA JAKU… Bala lemambang benung nimang pandung didiri ba tengah ruai ba sebengkah pengawa dikumbai Gawai Namaka Tuah adap Batang Rajang di Kapit.

Ngetan Jaku Asal

Nya kebuah tuat ruai nya didirika iya ngambika ulih dikena ngenang sereta ngenanka pemanah jaku kitai bansa.

“Tuju pengawa tu dikerengkunka aku ngambika jaku kitai bansa enda lenyau mabun laya nitihka aki ini kitai ke Serawai Mandai Betangga Tunggang.

“Pia mega, ruai tu ulih bediri teguh awakka iya tau nyadika pesaka sida Titik Nasan Pantau Ajan Panjai Lengan, Tuai Sebayan ba Bedega Lintang Takang,” ku lansa penemu Allen.

Bedua Penemu

GAH… Penegap tuat rumah panjai ngayankan pengangkun kitai ke pesaka ditampung ari aki ini menya.

Nangkan nya ku Allen, utai ti dipantaika iya ba ruai endang iya enggi bala mayuh

“Semua utai ke bisi dit sigi enda salah diambi tauka dikerembaika ngambika jaku kitai Iban tau ngerembai ngerekai serata dunya laban kitai Iban sigi patut bekunsika buah penemu ti manah enggau pangan diri.

“Penga aku tu baka ke beduaka lampang rusa, bebagika lampang babi, ngenjuk lampang pelanduk, betetakka lampang bayak.

“Ngambika utai ti berat tau nyadi lempung, utai simpi tau segala, utai bingkuk tau lurus.

“Bekunsi kitai pengidup ti manah enggau pangan diri ngambi ke bansa kitai tau pegari ditemu dunya, bediri sama tinggi, duduk sama pemaruh enggau bansa bukai,” ku Allen madah nyemetak.

Adat Basa

Taja pia ku Allen, enti kitai amat begunaka penemu orang bukai nadai salah kitai minta, nyabang ngena chara ke patut kelebih agi isi tauka utai ke bisi dibantai ba ruai tauka blog iya nya.

“Kasih mih tudah pangan ti udah kiruh, ngelimpangka jam diri begigaka penerang dikena nirika tuat ruai tu lalu anang temu te ngambi pia aja.

“Kitai mega nadai salah bela beduaka penemu, penerang laban ruai dituat nyangka agi mayuh pengurang sereta kenang mih tudah pangan dalam penatai penyanding penemu,” ku Allen, pemenggi enggau pemungkal www.LekaMainIban.WordPress.com.

Sanding penemu

Kepenudi bendar ku Allen, iya ngarapka ruai dituat nya ulih nyadika penyanding penemu ngagai bala pengajar Iban, nembiak redak ke agi belajarka jaku Iban baikka iya di tikas sekula, institut pematih pengajar tauka palan pelajar tinggi.

“Angkat kitai sereta sama pejalai tuju singkang, angkat kitai seringkat baka manyi ninggal ke idang, angkat kitai beripih betitih baka angkis tama lubang.

“Munyi ku jaku sempama ti ditampung kitai rebak baru, dikelala damun ari kayu, buah ari langgu, dikelala bansa ari jaku, dikelala basa ari penyiru,” simpul Allen.