Beserakup nuju pemansang

Dayak rebak baru patut berubah

“Aku rindu nerenakka semengat pemereti ati ngagai kitai bansa belalauka rambai jaku Dayak Baru: Berubah enggau Beserakup Ngiga Pemansang.”

SRI AMAN: Raban bansa Dayak rebak baru dipinta berubah enggau beserakup nuju pemansang dunya kemaya hari enggau enda ngelengkaka semengat bansa ku Penyelaras PKR Sri Aman Norina Umoi Utot.

Ku iya, taja di menua Sarawak kitai bansa beberita mayuh ari beluh nyaru arang, beberita banyak ari lemetak di Tinting Kedang tang dalam dunya tu, bansa kitai amat baka garam enda bulih segenggam, amat baka berau enda bulih sechapan, amat baka paku enda bulih seemperan.

“Nya alai aku ngarapka kitai sama bela ulih nyukung sereta nulung bansa diri empu lalu sebagi ari chara pemadu muntang iya nya ngena chara negi sereta ngangkatka nama bansa kitai ngambika dipeda pegari ba dunya mansang tu,” ku Norina meransang.

Norina nibarka jaku peransang tu nyerumba Gawai Dayak ti deka diintu sehari tu, 1 Jun, enggau jaku sampi Gawai taun tu kitai bansa ulih dani, ulih bediri nitihka ubah nipakka pemansang politik enggau ekonomi menua.

Norina Umoi Utot

“Aku rindu nerenakka semengat pemereti ati ngagai kitai bansa belalauka rambai jaku Dayak Baru: Berubah enggau Beserakup Ngiga Pemansang,”
Norina mega ngemai kitai bansa nikalka kenang baka ni Gawai Dayak diangkat enggau diaku perintah menua nyadi hari besai kitai bansa Dayak kena 25 September 1964.

“Lalu 1 Jun ditetap nyadi kemisi hari besai dikena kitai ngintu Gawai Dayak ti digazet Perintah Sarawak, kelai ngaku kaul kitai bansa dalam politik menua.

“Semengat baka tu deka dibai aku diidupka baru kelebih agi rebak nembiak ti deka nampung pengawa nyadi ketuai menua jemah, nentuka kuing menua nuju pemansang dunya” ku Norina madah nyemetak.

Kitai mega patut ngasika jaku sida ke tuai ti nyebut kenyalang tebilang ketegal tangkung, bukit beberita ketegal remaung lalu bansa Dayak deka dipebasaka enti begempung.

“Kempat Tiang tebilang laban langgai, Sarawak tampak ketegal sungai sereta Dayak deka kering enti segulai sejalai.

“Kelingkang tebilang ketegal tinting, Panggau Libau beberita ketegal Keling enggau bansa Dayak bekuasa enti sama penemu saum runding.

“Batang Lupar tebangkar ketegal Bujang Senang, rita Gelung begemung laban Kumang lalu Dayak pegari nama jelai rita enti sama kuing saum singkang segulai sejalai,” peransang Norina nibak jaku sida ke tuai.

Ngena awak tu mega Norina ngarika sida sebilik ngenataika jaku pesan selamat ngintu Gawai Dayak enggau sampi ngajihka betuah belimpah, gayu guru, gerai nyamai, lantang senang nguan menua.