ARTIKEL

Dagang selabit nerima peminta komersial

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

KANOWIT: Ngembuan pengelandik jari nyadi pengelebih ngagai Jerome Anak Francis, 68 taun, ngulihka belanja sida sebilik kelebih agi sekumbang pandemik nuntung menua ti nyau deka manggai dua taun diatu.

Anak bujang iya, Richie Jerome madahka apai sida endang orang ti landik beranyamka macham kraf jari ti nyadi sebagi ari kereban dikena beridup ba rumah panjai.

Ku Richie, apai iya udah lama ngemeranka pengawa ti dipelajar enggau ditampung ari niang aki sida lebuh iya baru berangkat bujang suba.

“Apai kami semampai enggai jenuh jari, beranyamka bemacham utai baka selabit tauka seladan lalu bisi sekeda menua orang ngumbai ladong.

LAKU… Richie ngelakuka selabit ungkup anak mit digaga apai iya, Jerome ba Facebook.

“Terubah nemu beranyamka selabit suba, apai endang ngaga utai tu ari ajar niang apai iya empu suba.

“Pemuas ke meda sida ke tuai ngereja pengawa nya ba ruai, dia apai lalu minta ajar aki kami, nyau ngining meda keranjai jari orang ku iya.

“Udah nya apai nyau deka nemu magang ngaga utai anyam kelimpah ari selabit laban sigi puh belajar enggau jampat nangkap utai diajar.

“Apai ditemu kami serumah landik ngaga bubu, nganyam lanji, ngaga sarung enggau ulu sereta ngaga enggau ngukir terabai sereta macham utai bukai,” ku Richie ngenang pengawa apai iya.

Iya madah, sida sebilik diau ba rumah panjai ti betuaika Tuai Rumah Benar, Nanga Lipus, Kanowit, urung 20 minit pejalai ari Pasar Kanowit nengah jalai darat.

NURUN NGIGA WI

NURUN NGIGA WI… Richie enggau apai iya benung begigaka wi dalam kampung.

Ngenang pasal pengawa apai iya ke beranyamka selabit ku Richie, terubah nya sida meapai deka nurun ngiga rutan tauka wi ngagai kampung kin.

“Ari rumah kami sebuat nurun ngelayang ai Kanowit, udah nya niti jalai kem batang lama baru tama ke dalam babas ngiga wi lalu ukai sengapa wi ke digiga.

“Nyadi kena ngaga ke isi selabit iya nya wi seruk enggau bingkai iya digaga ari wi tunggal seraya lilit iya ngena wi batu.

“Reti iya, ba siti-siti selabit ti dianyam nya deka bisi tiga bansa wi diguna, nya kebuah selabit teguh dikena enggau disimpan.

“Pengawa ngiga wi endang apus hari laban tama jauh ke dalam kampung ngulihka wi tiga bansa nya lalu ukai pengawa ke muntang dikereja.

“Chukup penyampau wi ku anak ati, baru kami mulaika diri ke rumah, hari pan nyau ngalih meh endur ngenataika diri ba rumah,” ku Richie ngelansa pengawa begigaka wi.

Udah sida meapai datai ba rumah, wi nya deka dibelah dulu sebedau diraut mit nitihka pemesai taga selabit ke deka digaga.

Richie madah, enti selabit mit ungkup anak mit tauka nembiak mit, wi diraut mit enggau alus agi.

“Tembu pengawa melah enggau ngeraut wi, baru apai berengkah nganyam selabit.

“Kira dua tauka tiga hari baka nya tembu ga siti selabit ke besai dianyam apai lalu ke mit nya kira sehari.

“Nyadi enti selabit ke betali, kira sehari setengah endur ngaga laban pengawa rumpas agi, semina melah tali aja.

“Udah tembu dianyam, selabit nya lalu digerenis silik ngambi bekilat dipeda enggau teguh kelimpah indu utai baka indu bubuk enggai nutu,” ku iya nampung randau ke ujung agi.

AGI REGAS… Apai Richie benung nganyam isi selabit.

BEJUAL ONLINE

Terubah suba, selabit apai nya dijual enggau dibeli orang sebelah genturung pendiau enggau menua semak aja, baka bala semenua enggau kaban belayan diri.

Sida meli nya endang dikena diri empu lebuh bisi mindah ke tanah tauka nurun begiga sebelah kampung enggau babas, bisi nya kena mulung rian, niki isau ke alai selabit digaga pisit agi, enggau ngarang buah bukai.

“Enti suba, maya orang bisi nguna baru apai ngaga selabit. Dagang mega enda tentu, nitihka peminta. Kira kena ngiga belanja tambah ke kami sebilik aja.

“Tang diatu selabit apai udah dijual chara komersial laban mayuh peminta ari luar Kanowit nengah media rama, bedagang chara tali arus tauka online ku orang kemaya hari.

“Aku nyaup apai bejualka selabit nya nengah aplikasyen Facebook enggau WhatsApp, tau digiga ba Facebook RICHIE MIKAI tauka lumur WhatsApp +60 19-826 1148.

“Dia bala kita ulih meda penerang baka pemesai enggau gambar selabit dikedeka ati, pemilih kita,” ku Richie bekunsika penerang pasal dagang selabit online sida.

Kelimpah ari selabit dianyam apai sida, indai Richie mega bisi beranyamka kraf jari bukai baka pemansai, tikai, sintung, uyut, kelanta, timpa sereta utai bukai.

Semua kraf jari apai enggau indai iya bisi dijual nengah dagang online ti ditumbuhka Richie empu ari pemanah timbal diterima ari sida ke meli.

PUH GAWA… Apai Richie ngereja pengawa ba ruai lebuh nganyam papan selabit.

“Aku mega bisi betulungka bala nyual kantung enggau produk kraf jari bukai dianyam ari bila buluh ti nerima mayuh peminta laban orang rindu mega chura enggau ukir tauka bungai anyam sida.

“Pama meh ulih nulung kami sebala ngiga belanja taja pengawa tu begunaka pengiruh, pengeregas tulang gawa enggau belanja, tang bisi ga pengulih ti setipak enggau pengelelak.

“Kebuah aku munyi nya laban begunaka pemintar runding lebuh ngelakuka produk, mesti ka sikar lebuh ngambi enggau ngerikod udar, udah nya nungkus enggau nyelinting hari ngelawa palan servis nganjung barang.

“Tambah mega nitihka Atur Pengawa Standard (SOP) berindik ari Atur Mindah Betagang (PKP) Renggat kedua dipejalaika perintah dikena nagang Covid-19 ngerekai.

“Nya kebuah pengawa ke deka diadu mesti berundingka semua pekara ke patut enggau enda, enda alah nyau medis diri empu,” ku iya ngenang pemar ditapi lebuh bedagang ba jeman pandemik.

BESAUP NGIGA BELANJA… Apai enggau indai Richie benung beranyamka selabit enggau kraf jari bukai ba ruai.

PRODUK SELABIT LAKU

Dalam kandang seminggu udah bedagang online ba media rama baka Facebook, mayuh amat orang ngudar selabit mit enggau besai.

Ku Richie, selabit nya mayuh guna. Taja orang ke meli nya nganti lama endur selabit tembu digaga laban nitihka gintir udar diri empu, tang sida tetap sabar nganti.

“Selabit besai mayuh orang nguna kena bejalai ke tanah, ke kebun ngema sum, mai jelu ulih ngasu, kena nyimpan buah, ngangkut buah sawit enggau mayuh ke bukai.

“Seraya selabit ke mit dikait ba dinding nyadika pemandang ba bilik penaik tauka kena mai bekal maya nurun gawa ke babas tauka opis, gaya idup kitai Iban.

“Bisi sekeda meli laban nyau tekait ati meda anak mit begambar ngema selabit enggau nepu buah getah ke dalam bubu ba sebengkah pekit diatur nengah online empai lama.

“Nambahka nya, selabit mit dibeli engkeman endar nyadika tepa tauka tanda pengingat ngagai pangan diri,” ku Richie lalu tuchum ngingatka ulah enggau tuju sekeda bala ke meli.

SUKUNG KRAF JARI KITAI

Besai juluk ati Richie bala mayuh semampai nyukung keranjai apai enggau indai sereta bala sida ti bisi dijual iya.

“Aku ngarapka bala kita ke udah meli tau bepadah ngagai bala bukai meri sukung ngagai dagang selabit apai aku enggau produk ke bukai.

“Pelaba aku, nyau nadai mayuh tubuh orang ke nemu enggau landik ngaga selabit diatu, kelimpah mayuh menua udah rusi ketegal pengawa betebangka kayu batang ngujungka wi pedis digiga.

NI DIKEDEKA ATI… Richie mantaika selabit digaga apai iya.

“Nya alai aku minta kitai sama nyukung bansa diri ngangkatka pesaka bansa kelebih agi produk kraf jari baka selabit tu nyadika pengelala bansa kitai ba menua luar,” ku Richie nibarka jaku peransang.

Iya madah, taja diau di rumah panjai, nadai utai enda ulih dikereja asal meh kitai bagas enggau ransing gawa.

Engkayu rumah panjai chukup mayuh enti kitai enda mang tulang nurun begiga, bisi lebih tau dijual ambi nambahka belanja.

“Di rumah panjai ulih ngasu, berikan, beranyam, sereta nyual asil kampung nengah jalai ke betul.

“Semua tu pengelebih dikembuan orang rumah panjai dikena nyungkak ekonomi seikas enggau ke diau enggau gawa di mengeri, mesti ka jauh tinjau penemu,” ku Richie nyimpul randau begulai enggau Suara Sarawak.

BERITA LAIN

BERITA TERBARU

Sarawak rancang anjur SMeC berskala besar

KUCHING: Sarawak merancang untuk menganjurkan Persidangan Media Sarawak (SMeC) berskala besar tahun hadapan susulan kejayaan penganjuran julung kali acara tersebut tahun ini. Timbalan Menteri di