Nempa nama ari dagang produk berau

SIMANGGANG: Bepun ari pengeliat enggau pengingin ati deka ngangkatka tikas idup sida semenua, Imelda Bragie mujur nyadi entara pedagang ke mujur nempa nama ukai semina ba menua tu aja tang mega udah rembus ngagai makit entarabansa.

Imelda madah, padi diinjin nyadi berau nya pun pengidup bansa Iban dataika sehari tu lalu tebal agi mengkang dikereja peranak menua pesisir enggau menua ulu ngena chara lama.

Ba Semenanjung mega agi ngemeranka pengawa bumai dandang besai tang ngena chara moden ti muntang dikereja ngena mesin ti ulih ngelimatka mayuh belanja enggau tubuh pengereja.

Imelda Bragie, peranak asal Simanggang mujur nyadi pedagang ti ngelakuka produk asal ari berau chelum, berau burak enggau berau mirah.

Kitai bela nemu, bansa berau dijual tu mayuh ba menua Sarawak lalu nerima mayuh peminta ari menua luar ke kala nemuai kitu.

DIKERINDU… Siku ari temuai datai ari menua luar meli enggau napatka berau laban ke nyamai diempa.

Buah penemu iya tu berindik ari pengingin ati deka mantu raban kurang penatai pemisi tauka dikumbai raban B40 ngambi ulih sama nyingkang sebaka enggau orang bukai.

“Aku ngepunka dagang tu endang deka mantu raban diselinting kelebih agi orang ba rumah panjai laban kitai bela nemu sida tu mih kurang penatai pemisi kelimpah ari bumai.

“Nya kebuah, aku meli semua berau sida lalu ngena berau nya ngambi nyadi produk dikedeka aku nyengkaum sabun, scrub, edible straw enggau berau nya empu.

“Nengah chara tu, aku ukai semina ulih ngangkatka dagang diri empu tang mega ulih mantu sida nambahka penatai pemisi laban pengawa bumai nya aja ke nyadi pun belanja sida.

NYAMAI… Ai irup digaga ari berau chukup nyamai diirup kelimpah manahka pengerai.

“Aku meli semua tiga bansa berau sida ke ba rumah panjai kelebih agi ngelingi sitak Simanggang tu lalu nginjin sereta nyual nyadi produk aku empu,” ku iya nerang.

Chap dagang berau, Benak Raya Enterprise, diatu dikelala serata dunya lalu majak besemekih enggau pedagang bukai ditu ngambi diterima lalu ulih nangkup peminta sida ti rinduka produk ari berau.

“Aku ngepunka dagang dalam taun 2016 ke alai berengkah ari udar udah nya dianjung ngagai penguna.

“Nambahka nya, nengah pelasar dagang ngaul ekonomi digital bekenaka rentayan website baka Facebook enggau Instagram, dagang muntang agi dipejalai.

“Bala penguna suah ngelawa Facebook Benak Raya Enterprise enggau Istagram, imelda¬_bragie lebuh ngudar enggau meli produk dikedeka sida,” ku Imelda nerang.

KENANG NEMUAI… Imelda begambar kenang enggau siku temuai luar ke meli produk Berau.

Ku iya, ari siku penguna lalu majak nambah belama orang ke suah meli produk enggau rinduka produk berau Benak Raya.

Berindik ari mayuh peminta ngujungka aku besedia nyadi siku ari penyereta reruai ba ekspo sepanjai taun laban deka ngelakuka produk dikembuan serikat aku tu.

Imelda madah, dikena nambahka peneleba enggau nangkup peminta mensia mayuh ti rinduka produk tu, iya mega suah nyereta ekspo ba Sarawak, Kuala Lumpur enggau Singapore maya bisi pengerami besai diatur din.

“Lebuh nyereta mayuh ekspo ba mayuh menua baka ba Sarawak, Kuala Lumpur enggau Singapore ngujungka mayuh orang meli produk aku kelebih agi temuai luar baka temuai ari United Kingdom, California, Australia, Jepun enggau Korea.

Imelda madahka diri berasai temegah enggau lantang ati sereta berasai chukup gaga laban produk Berau by Benak Raya majak diterima ba makit ditu tang rembus ngagai makit entarabansa.

NGALUSKA MUA… Scrub mua digaga ari berau chukup manah enggau ulih ngaluska mua kitai.

Nambahka nya ku Imelda, iya berengkah nyual 3 bansa berau iya nya berau chelum, berau mirah enggau berau burak kelimpah ngaga sabun nyadi scrub ngambi ngaluska mua, ai irup, pemakai anak mit, digaga nyadi straw enggau tanda kenang ke suah dibeli temuai ngambi bisi pengingat sida nemuai kitu.

Semua produk Berau by Benak Raya tu di baruh my ipo nya harta intelek serikat Benak Raya.

“Produk ti dijual aku tu chukup manah laban nadai utai tambah bukai enggau endang diadu kediri empu ungkup penguna enggau pemberi produk aku laban serikat aku endang ngemeratka kualiti sereta timbal ari bala penguna produk Berau.

“Ba penemu aku, kualiti tu chukup besai reti dalam bidang dagang laban pemanah produk tu ulih nambahka penguna tetap enggau matak mayuh agi orang rinduka semua produk dikelaku aku nengah chap dagang Berau.

“Mayuh pekara dipelajar aku lebuh bedagang kelebih agi ngelakuka produk tu dataika tikas entarabansa ke alai aku mayuh nerima timbal tauka perambu sentang produk dikembuan ngambi ulih ngemanah chara dudi hari,” ku Imelda nerang.

“Pemujur aku dataika tikas tu bepun ari pengawa dikereja ninting hari. Kitai ulih mujur enti ngembuan pengeran enggau bebendar gawa laban semua pemujur enda ulih dijapai enti nadai pengepuh enggau pengeliat ati ngelakuka produk diri empu.

“Pemujur aku apin lama nya datai ari sukung kami sebilik enggau orang bumai ke seruran mantu aku sereta kami bela mantu pangan diri laban kitai sama nemu pengidup ba rumah panjai endang bepanggai ba pengawa bumai betaun.

Berebak enggau nya, Imelda madahka diri mujur pengudah pekit dunya tu laban iya suah nyereta pekit enggau bengkel bekaul pengawa dagang di menua tu.

“Mayuh pemujur enggau kenang manis diasaika aku sekumbang nyereta mayuh pekit enggau bengkel sekalika ba menua tu tauka ba menua luar.

“Aku berasai chukup gaga enggau temegah laban diatu produk menua kitai majak diterima ba menua luar laban ngembuan pengelain kelimpah enda dipegulai enggau utai bukai.

Entara pekit ke kala disereta Imelda tu nyengkaum Sarawak Shell Live Wire Winner 2017, Rancangan Perniagaan Terbaik Tube 5 SME Corps Sarawak, Champion Zon Awam Yayasan Inovasi Sarawak 2018, Champion Zon Awam Yayasan Inovasi Sarawak 2019.

Berindik ari nya, iya mega kala dipilih nyadi Top Ten Innovator Shell Live Wire 2019 ke alai Berau by Benak Raya ngarika Malaysia bepekit enggau 21 pemekit lalu chap dagang Berau mujur menggi gelar Outstanding Achievement Award Winner.

Imelda mega kala nyadi Finalist Superb Teraju 2019 enggau nerima Anugerah Dagang ari Top Ten International Shell Live Wire Innovator 2019.

“Anugerah pemadu tinggi ke diasaika aku enggau chap dagang Berau iya nya Tuanku Permaisuri Agong Malaysia mega nyukung produk tu lebuh iya meli sekeda produk ari berau chap Benak Raya rambau ekspo ba sebengkah endur di Malaysia.

Nambahka nya, pengempu chap dagang Berau madahka diri deka mantu raban B40 lalu sida sama mantu pangan diri kelimpah ngemujurka juluk Kepala Menteri Datuk Patinggi Abang Johari Tun Openg nempa mayuh agi pedagang menua kelimpah nyungkak ekonomi Sarawak.

“Aku agi ngena chara lama laban deka ngetanka penyelai enggau pengelain ari aki ini kitai kelia ngambika chara lama enda punas diserunyut arus pemansang dunya,” ku Imelda madahka diri nginjin berau agi ngena chara lama.

“Nya kebuah, aku ngarap ulih ngemansangka serikat tu manah agi laban diatu udah dipegai di baruh Shell seraya lima taun ke deka datai, aku ngembuan juluk ati deka bisi kilang besai ungkup nginjin produk Berau by Benak Raya,” ku juluk ati Imelda.

Kelimpah ari nya, iya mega ngarapka produk enggau chap dagang iya tampa rita ba serata dunya laban iya dekaka mayuh orang sedarka pemesai guna ngetanka penatai asal enggau dagang asal.

Berindik ari nya, pemekal produk Berau bisi ba sekeda endur nyengkaum Kuching, Kuala Lumpur, Johor Bahru enggau Singapore.

Serikat Benak Raya mega suah nyuaka pemeri ngagai komuniti ti kurang benasip baka raban Orang Nyelai Pendiau (OKU), Orang Pekak enggau Autism sereta raban bukai ke begunaka bantu tauka ditinggang penusah.

Pengempu chap dagang Berau ngarapka dagang iya majak diterima ukai semina ba menua tu tang mega dataika tikas entarabansa.

Nya alai ku iya, nadai utai enda ulih dikereja kitai ba dunya tu ba sebarang bidang dikerindu kitai enti ngembuan pengepuh, pengeliat ati enggau pengeran ngemansangka diri enggau mantu orang bukai.

Pengawa bedagang tu chukup besai lalu sapa-sapa ulih mujur enti ngembuan perambu tauka chara ke betul ngambi kitai ulih besemekih enggau orang bukai sereta sama nyingkang.