Bantu mih nembiak mit ti benggal

“Sida meseti diajar tauka dilatih bejaku sereta nyebut laban ba renggat tumu sida nadai nemu utai.”

KUCHING: Apai indai sereta mensia mayuh patut besaup mantu nembiak ti bisi penanggul benggal pending pengudah sida berengkah ngena kereban Implan Audiotori Pangkal Untak.

Mandal Presiden Hearing and Aural Rehabilitation Society (Hear) Sarawak Dr Alexander Stephen madahka pengudah ngena perengka nya nembiak mit deka terus dipatih ninga, nyebut sereta ngeluarka bunyi.

“Sida meseti diajar tauka dilatih bejaku sereta nyebut laban ba renggat tumu sida nadai nemu utai.

“Laban sida ninting hari begulai enggau apai indai nya kebuah apai indai ngembuan tanggungpengawa ti berat ngelatih sida ba rumah,” ku iya.

Alexander bejaku munyi nya lebuh ditanya pemberita pengudah aum pemberita deka ngatur Pengerami Makai Lemai sereta Ngumpul Belanja Hear Sarawak 2020 di Palan Aum Borneo Kuching (BCCK) ditu, ensana.

Ku iya, implan tu udah digaga bepun taun 2016 sereta udah mujur dikena ngagai enam iku nembiak.

“Pengeransing ati endang beguna dalam ngelatih sida lalu pengawa tu mega begunaka belanja ti besai.

“Maya pemadu manah ngadu implan tu iya nya maya umur sida bedau manggai empat taun ngambika nyamai agi dilatih,” ku iya.

Kelimpah ari nya, iya madahka implan tu enda deka mujur digaga ngagai orang tuai besai laban udah kelalu laun.

“Enti udah besai chara deka ngelatih sida enda muntang agi.

“Tang nyemai orang tuai besai ti sigi nemu bejaku sebedau nya lalu iya bisi dituntung penusah bebadi jalai alun ti ngujungka iya nadai nemu bejaku agi ulih ngena implan tu,” ku iya.

Tambah iya, sida merambu deka ngelatih mayuh agi apai indai, bala pengajar sekula, indu misi enggau bala ti bepenau bukai nyereta latih enggau bengkel mantu nembiak mit ti berubat ngena chara implan.

“Nya kebuah, aku andalka mensia mayuh deka sama besaup meri bantu sereta nyukung bala nembiak ti begunaka implan nya,” ku iya.

Suara Sarawak