Intu Gawai Dayak nitihka adat, tradisi – Mawan

KUCHING: Gerempung Bansa Dayak Sarawak (SDNU) merambu sebengkah gempung ditumbuh ngatur pengawa ngintu Gawai Dayak renggat nengeri enggau nasional lalu ukai semina sebarang raban tauka orang ngatika diri.

Presiden SDNU Tan Sri William Mawan Ikon mansutka penemu nya laban pengawa numbuhka gempung nya deka nentuka ripih pengawa, adat enggau tradisi Gawai ti patut ulih dibantai sereta ngangkatka status Gawai nya empu.

Ku iya, Gawai ke diintu raban bansa Iban, Bidayuh enggau Orang Ulu patut nyadi hari besai ti diangkat sereta diintu nitihka adat enggau tradisi.

“Gawai diatu ulih diintu tumu tauka laun laban nadai tatak hari tauka timpuh ngintu hari besai tu.

“Nadai kuasa enggau ripih pengawa ti betul lalu sekeda raban tauka orang ngatika diri tau beambi ulih ari pengerami tu ungkup penguntung sida empu,” ku iya lebuh bejadika Bazar Gawai Dayak SDNU 2019 ditu, kilah ensanus.

AI PENGAYU… Mawan bejadika pengawa ngelanchar Bazar Gawai Dayak SDNU 2019 di Kuching, kilah ensanus.

Ngelansa pasal ngintu Gawai Dayak Renggat Nasional ke diatur di Bintulu kena Hari Enam tu tadi ke digulu Menteri Komunikasyen enggau Multimedia Gobind Singh Deo, ku Mawan pengerami nya diatur sekeda orang enggau nadai ngaul kerejasama ari gempung ti ngarika raban bansa Iban, Bidayuh enggau Orang Ulu.

“Ripih pengerami deka manah agi enti raban pengatur berunding enggau Perintah Sarawak enggau ketetiga gempung ti ngarika raban bansa Iban, Bidayuh enggau Orang Ulu,” ku iya.

Kenu ku penemu Mawan, semina sekeda orang aja ngaul diri ngatur pengerami nya lalu enda diatur nitihka pematut sereta ngasuh peragam ti bebida pasal Gawai.

“Ukai ketegal gaya pekayan. Enti Gawai tu ngaul pengawa miring lalu pengawa ti patut dikereja iya nya nganjung piring lalu sapa bagi ke bisi kuasa nentuka iya?

SUKUNG… Mawan ngelimpangka awak diri meda produk kraf enggau bup ke bisi dijual. – Gambar Anne Samuel.

“Kita mega enda ulih mangkung tawak sepeneka ati. Bisi chara, bisi ripih pengawa, adat enggau tradisi ti bekaul enggau pengawa tu lalu pekara tu patut diperati,” ku iya nambah.

Ngelansa pasal Bazar Gawai Dayak SDNU 2019 berengkah diatur kilah ensanus lalu tembu 24 Mei tu, ari pukul 3 lemai nyentuk 11 malam.

Lebih 60 bangsal bejualka bemacham produk kraf, pemakai enggau barang bukai bepalan di Christian Ecumenical Worship Centre ditu.

RICHAH… Raban Serakup Graduet Dayak Sarawak (SGDA) mega enda muai awak bejualka kraf sida. – Gambar Noelle Morse.

 

ARAM SAMPAL DATAI… Kain Rentang tesau Bazar Gawai Dayak SDNU diatur 19-24 Mei 2019.