Issabelle Semanjan majak pegari

Diatu, video Issabelle betanda ‘Sleepy Mummy’ udah dipeda lebih 4 juta iku orang nengah instagram iya empu bekau ari penau iya betanda ba lagu nya.

Nama Issabelle Semanjan majak pegari pengudah pengelandik iya ditemu mensia mayuh nengah video Sleepy Mummy ke ayan ba menua rama.

Iya siku anak Iban tulen ke baru manggai umur tujuh taun tang diperati chukup bepenau belagu, betanda sereta udah pandai begaya.

Gaya Issabelle mujur narit ati mensia mayuh ukai semina ba menua tu aja tang mega nyentuk ke menua Indonesia.
Isabelle kala dianjung nyereta mayuh pekit nyengkaum Pekit Kumang Anak Mit ke alai iya kala bulih lumur dua ba Pekit Kumang Anak Mit tauka bulih gelar Selinggar Matahari Nembiak Mit Smart Reader ba sebengkah pekit kumang diatur ba endur iya besekula.

Lebuh dirandau Suara Sarawak, apai iya madahka Issabelle tu chukup rindu belagu enggau nitihka gaya mua enggau tanda nya endang dipelajar iya ari media rama baka Youtube enggau Instagram.

BAJIK… Issabelle ukai semina ngembuan gamal ke chukup bajik tang mega landik belagu sereta betanda.

“Nambahka nya, iya mega rindu amat meda channel tv ke bisi mantaika chara orang betanda,” ku Daleton.

“Semua chara enggau gaua betanda endang dipelajar iya empu seraya Issabelle mega semampai ngingat enggau nunda gaya tanda nitihka muzik ti dimain.

Diatu, video Issabelle betanda ‘Sleepy Mummy’ udah dipeda lebih 4 juta iku orang nengah instagram iya empu bekau penau iya betanda ba lagu nya.

Video iya dipandang nengah aplikasyen tiktok enggau instagram sereta video bukai dipeda mayuh orang nyentukka iya suah narit ati laban landik nitihka gaya lingguk tubuh enggau nundaka leka lagu dalam nya.

Pia mega, Isabelle tu chukup landik nunda gaya tanda enggau leka lagu ba lagu Didi & Friends nyentuk iya dikangau ngagai Meletop, sebengkah channel TV pemadu tebilang ba Malaysia.

ARAP TERUS MUJUR… Issabelle begambar kenang enggau apai indai iya sebedau bekejang ngagai Kuala Lumpur lebuh dikangau ngemujurka sebengkah channel tebilang, Meletop pengudah iya viral ba media rama.

Video iya betanda seraya belagu nitihka lagu ke udah viral ari lagu Didi and Friends Sleepy Mummy dipeda mayuh orang sereta dikunsi mayuh orang nyengkaum dibantai ba sebengkah berita di menua Indonesia.

Berebak enggau nya, apai iya madahka Issabelle mega rindu enggau orang bepekit baka ngajat enggau mantaika pekayan asal bansa Iban.

Ku Daleton, anak iya kala bulih lumur ba pekit kumang maya agi ba tadika ke alai lebuh nya iya agi beumur empat taun setengah seraya nyadi pemekit pemadu biak.

Issabelle mega kala ngarika sekula sida taun nyin kemari ngambat penatai Yang Mulia Tengku Mahkota Perlis enggau Menteri Dagang Temuai Sarawak, Datuk Abdul Karim Rahman Hamzah.

Daleton mega semampai ngemeratka enggau ngajar Issabella pasal pemesai guna pelajar.

“Diatu, kami duai endang bejaku enggau iya ngena jaku English enggau jaku Iban lalu ngarapka iya ulih belajar jaku bukai laban iya diatu udah Primari Satu.

“Aku mega ngarapka iya pandai enggau bisi ati belajarka subjek baka Jaku Melayu, Matematik enggau Sains.

“Aku endang ngarapka iya terus mantaika pengidup ba media rama laban aku ngasaika media rama tu beguna amat lebuh mantaika pengidup kitai besehari-sehari.

“Kelebih agi lebuh iya anak Iban keterubah ti chukup tebilang enggau dikerindu mensia mayuh ba media rama ke alai orang ke rinduka iya datai ari mayuh bansa enggau menua,” terang iya.

“ Aku berasai temegah laban Issabelle diterima mensia mayuh taja baru beumur tujuh taun ketegal pengelandik iya betanda enggau pemintar iya ngingatka gaya tanda nitihka leka lagu.

Kelimpah ari nya, Daleton semampai mesan enggau ngajar anak iya ngambi belajar bebendar lalu enggau naka ulih nempa pemujur ba pengidup.

“Kami duai mega suah nangkan Issabelle bebasaka orang bukai enggau semampai nanya ngagai bala pengajar enti sema bisi utai pelajar enda ditemu lalu diatu iya semampai ngasika jaku.

Issabelle diatu ngembuan followers 860K lebih ba Tiktok, 660k lebih ba Instagram lalu penyampau followers tu majak nambah ninting hari dataika nyadi kaban nengah media rama ari mayuh bansa enggau menua.

Suara Sarawak