SIBU: Peranak Pasai Siong dibaruh pegai sitak Dun Tamin deka berasai lantang pengudah projek nyeleti Jalai Pasai Siong deka tembu ujung taun tu.
Adun Tamin, Christopher Gira Sambang madah, projek nyeleti jalai nya udah dikemendarka Kepala Menteri Datuk Patinggi Abang Johari Tun Openg lebuh ngatur pejalai gawa ngagai Pasar Selangau sebedau tu.
Ku Gira, projek nyeleti Jalai Pasai Siong urung 20 kilometer (km) pemanjai nya beungkus RM11 juta ti mungkur tiga kandang menua iya nya Siong Ili, Siong Tengah enggau Siong Ulu.
“Kereja nyeleti jalai nya diatu benung chakah dipejalai ke alai udah manggai 63 peratus tembu.
“Aku andal amat projek tu ulih tembu ujung taun tu,” ku iya lebuh dirandau Suara Sarawak.
Gira madah, pengudah Jalai Pasai Siong nya tembu penuh ila deka meri pengelantang ngagai peranak ari 30 buah rumah panjai, dua buah sekula, tadi enggau klinik pengerai ke bisi dia.
Nya alai, timpuh pejalai peranak Pasai Siong ngelawa Pasar Sibu deka pandak enggau semak agi, semina setengah jam aja enti dibanding ke diatu urung sejam pengelama.
“Projek nyeleti jalai tu mungkur pengawa melakin jalai batu 9.7 km pemanjai ba sitak Siong Ili, 7.3 km ba Siong Tengah enggau 3 km ba Siong Ulu.
“Jalai tu mega deka meri penguntung ngagai sida ti ngemeranka pengawa betanam betupi baka ladang sawit, pekebun sayur enggau ke bukai nyual asil kebun sida ngagai Tamu Ujung Minggu di Pasar Sibu.
“Rayat ditu udah nganti betaun pengelama projek nyeleti jalai nya lalu sida suah mantaika sebana diri merinsa nengah jalai bebatu ti ukai semina ngerusak entukar tang mega tau ngeruga pengelikun sida dia,” ku Gira madah nyemetak.
