KUCHING: “Sehari sebedau Tok Nan ninggalka kitai, iya kala mesan nama kebuah iya deka orang Sarawak sayau ke Sarawak laban iya chukup sayau ke Sarawak.
Nya alai,intu lalu jaga manah Sarawak enti sayauka Sarawak ,” kenu ku Datuk Patinggi Datuk Amar Puan Sri Jamilah Haji Anu, lebuh bekunsi jerita nya enggau bala media maya Pengerami Ngelalu Pengabang Aidilfitri, Hari Minggu tu tadi.
Jamilah madah, pengeransing Tok Nan nyadi ketuai ngagai bala rayat iya ulih dipeda taja deka mutuska seput.
“Iya agi berundingka pangku pengawa enggau devolusyen ti beguna ngagai orang Sarawak taja pan maya nya iya deka ninggalka kitai.
“Pengudah aku menang ba Pengawa Bepilih Mit (PRK) ungkup Tanjung Datu, aku ulih ngasaika ditating penanggul ti berat dilempai ngagai aku ari siku orang ti udah mati, deka meda pemansang ti digaga ba sitak Tanjung Datu,” ku iya.
Diatu, iya seruran matau pemansang infrastruktur enggau ngemanahka Program Transformasyen Menua Pesisir (RTP) ti udah dipejalaika ba sitak nya ngambika digaga manah, kelimpah bekaul enggau ai sereta elekterik lalu seruran beratika pekara ti bedau diputarka.
Jamilah mega bisi ngangauka Kepala Menteri Datuk Patinggi Abang Johari Tun Openg sama datai ngerami Hari Raya.
Jamilah enggau anak iya Azizul Annuar Adenan sereta sida sebilik ke bukai nerima manah penatai Abang Johari disempulang bini iya Datuk Amar Hajah Juma’ani Tun Tuanku Bujang.
Nangkanka nya, Abang Johari begulai enggau Jamilah sereta sida sebilik bejadika pengawa nyirap kek.
Mayuh bengkah pemakai dinahka ngagai bala temuai ti datai sereta diperindang ngena muzik aidilfitri sepanjai pengerami nya.
Sama bela datai rambau pengerami tu iya nya Kaban Parlimen Kapit Datuk Alexander Nanta Linggi, Adun Demak Laut Dr Hazland Abang Hipni,ex Sapit Kepala Menteri Datuk Patinggi Tan Sri George Chan Hong Nam enggau bini iya Puan Sri Lorna Enan Muloon, ex raban Parlimen Miri Tan Sri Datuk Seri Peter Chin Fah Kui enggau Direktor Yayasan Sarawak Azmi Bujang.
