ARTIKEL

Kisah siku ari Pasukan Polis Hutan, Tuai Insp ( B ) Alfred Brayan Tangkong

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

ENTI kitai ngenang hari besai baka Hari Sarawak enggau Hari Malaysia, tentu kitai berundingka pemesai jasa bala bujang berani ti udah bebendar ngetanka pengelikun menua.

Chukup besai pengawa sida bujang berani tu lebuh ngetanka menua, lalu endang patut diberi gelar tauka pangkat dikena kitai ngenang sereta meri terima kasih ngagai pengawa ke udah digaga sida.

Taja pia, enda semua bujang berani tu dikelala tauka dikenang laban mayuh entara sida tu nadai ditemu rita sepengudah sida pinchin tauka bisi kedua nya nyau lesi bebadi lebuh berambun nyawa ngelaban munsuh.

Tuai Inspektor (B) Alfred Brayan Tangkong siku ari bujang berani ke kala belaban enggau komunis urung taun 60-an.

Lebuh dirandau, Alfred madahka iya kala gawa nyadi siku ari Pasukan Polis Hutan (PPH) Kuching.

Ungkup penemu bala mayuh, PPH diatu dikelala enggau nama Pasukan Gerakan Am (PGA) lalu sida tu endang tampak rita bedengah enggau komunis kelebih agi nyaga pengelikun ba babas.

AGI REGAS… Alfred ke berumur 85 taun udah mayuh bejasa ngagai menua kelebih agi ba pengawa nyaga pengelikun ari serang komunis.

ASAL SKRA, SRI AMAN

Ada kenaka 31 Disember 1936, peranak Iban ari Skra, Sri Aman nya engka enda entu tampak rita baka veteran ke bukai kelebih agi ba raban nembiak rebak baru.

Ngepunka randau pasal peneleba iya gawa nyadi siku raban PPH, Alfred madahka pekara nya endang enda kala nyadi siti ari buah runding iya.

Kebuah pia ku iya, iya endang nadai pemandai ketegal enda besekula, lalu apai indai iya irau enggaika nadai orang bukai ngemataka ruang bilik sida enti iya nampung pelajar.

“Pengepun cherita aku tau nyadi siku ari raban PPH tu pengudah raban PPH datai ke rumah panjai lalu nanya enti sema aku bisi juluk ati deka nyadi siku ari raban sida.

“Aku nadai berunding panjai, tak minta ngapa lalu bulih pengawa nya,” ku iya.

Ku Alfred, laban ke nadai pemandai baka orang bukai, iya semina berengkah belajar pengudah nyadi raban PPH.

“Berengkah ari pengawa tu, aku belajar nulis nama diri empu, kelebih agi lebuh malam hari endang awak endur aku belajar laban aku sigi enda kala belajar,” ku iya nerang.

Alfred ngepunka pengawa iya nyadi raban PPH ba Kem Siol Kandis sebedau mindah ngagai kem ke bukai, lalu ke penudi iya gawa ba Kem Komandan Brigade, Jalan Astana.

Sekumbang 35 taun gawa, Alfred madahka iya mega kala gawa di Kem Airport Kuching (PPH), Kem Semunjak Serian (PPH), Kem Temudok Sri Aman (PPH) enggau Kem Lanang Sibu (PPH).

Kelimpah ari nya, iya mega kala gawa lebuh penyarut nyadi di Limbang ba pun bulan Disember 1962.

KENANG… Alfred bekunsika gambar rambau gawa nyadi raban PPH lebuh iya agi biak.

IDUP JEMAN KOMUNIS

Taja pan pengidup ba jeman komunis ukai muntang sereta lantang diasai baka ke diatu, tang Alfred endang ditemu siku ari raban PPH ti chukup bebendar lebuh bedengah belaban enggau komunis.

“Taja aku udah pinchin lebih ari 30 taun lalu diatu aku udah tuai, tang aku agi ingatka pengawa aku nyadi raban PPH,” ku iya seraya madahka semangat iya ti nyadi raban PPH enda kala padam.

Ngelansa baru kenang ti agi dikeingat Alfred lebuh nyadi raban PPH, iya nyemetak madah pengingat lebuh beperang enggau komunis entara pengingat ke mengkang dikeingat iya nyentukka diatu.

Iya mega madahka endang bisi sekeda ari raban komunis mujur dibunuh sekumbang gawa kelia.

“Lebuh nya, kami benung beperang enggau komunis, aku enggau Koperal Langgong mujur nimbak berapa iku raban komunis.

“Siku lelaki bansa Jawa, siku lelaki bansa Cina lalu siku munsuh ti enda dikelala mujur ditangkap kami lebuh nya,” ku iya nusi seraya madahka pekara nya nyadi ba tengah hari 27 Februari 1966.

OP JALA DI ASAJAYA

KENANG… Alfred (tengah) begulai enggau dua iku bakih iya lebuh agi gawa nyadi raban PPH.

Alfred madahka, kelimpah ari nya mega, siti ari pekara ke agi dikeingat, iya nya lebuh pengawa perang kedua enggau komunis ba Operasyen Jala kenaka 21 March 1970 ba genturung Nonok (diatu dikelala enggau nama Asajaya).

Berindik ari perang nya, Alfred, Konstabel Leng enggau Koperal Rubar mujur nimbak lalu munuh siku munsuh.

Nangkanka nya, ba Operasyen Hentam di Sungai Buda Pegong, Muara Tebas, Alfred mujur nimbak siku munsuh indu lebuh nitihka bekau ba operasyen nya.

Ukai semina nya aja, agi mayuh perang enggau komunis ke bukai udah diasaika Alfred, lalu mujur munuh mayuh munsuh menua nya enggau jari iya empu.

OP NGAYAU DI BINTANGOR

Ba Operasyen Ngayau, raban PPH ke betuaika komander PPP Leo Hu Tham Luke maya nya beperang enggau komunis di Tanjung Kunyit, Binatang (diatu Bintangor), Alfred siku ari raban PPH ke kala nyelamatka Lans Koperal Kuda Kendawang ke ditimbak ba perut maya nya suba.

Taja Kuda enggau siku agi raban PPH, Konstabel Semudam Kilen telih ba operasyen nya suba, tang sida mujur munuh dua iku munsuh, ku Alfred.

Amat dipeda mayuh jasa sereta pemendar Alfred gawa nyaga pengelikun menua, tang chukup sayau iya enda kala nerima pingat tauka basa baka bujang berani ke bukai.

Diatu, Alfred udah manggai umur 85 taun, tang pengingat iya pasal pekara ke nyadi rambau agi gawa ba PPH mengkang ba runding iya baka ke agi baru.

Lebuh bedengah enggau komunis, Alfred madahka diri enda kala takut, peluru munsuh endang bekedesup mansa nyelinting pala lebuh beperang.

Kelimpah ari nya, Alfred mega ditemu siku agi pengereja pengawa ti seruran besemangat sereta bedisiplin taja iya nadai besekula baka orang bukai.

Anak Alfred, Calvert Brayan, 55 mega bekunsika cherita pasal apai iya ngagai Suara Sarawak kelebih agi diatu apai iya nya udah tuai lalu enda entu ingatka utai ke nyadi diatu.

RABAN PPH… Gambar kenang Alfred enggau raban tim iya ke sama gawa nyadi PPH.

KEM BUKIT SIOL

Taja runding Alfred udah enda ingatka utai ke nyadi diatu, tang ku Calvert iya seruran betanyaka Kem Bukit Siol lalu minta diri dianjung kia.

“Aku madahka iya, nadai agi kem nya apai. Enti ditanya pasal kem ba Serian pan, nya udah nadai agi diatu,” ku iya nerang.

Calvert madahka, semua pekara ti nyadi rambau iya agi gawa suba endang dikeingat baka ke benung nyadi tauka agi baru, tang pekara ke baru diatu nadai dikeingatka iya.

Kekadang ku Calvert, apai iya nya suah betanyaka rita bakih ke sama rebak enggau iya gawa suba.

Nya alai ku Calvert, sekeda ari sida nya udah pinchin, bisi udah pulaika menua diri, lalu sida ke agi biak nya benung gawa diatu.

Ba lansa ke sama, Calvert madahka apai iya agi ingatka genap genturung alai iya gawa suba enti sida mansa endur nya.

“Ba dini-dini alai ke dipansa kami, iya endang ingatka genap endur nya.

“Jam, hari bulan, sapa enggau iya kia, semua nya endang dikeingatka iya,” ku Calvert.

Ku Calvert nusi, lebuh apai iya agi gawa enggau PPH, aki enggau ini iya kala ngasuh apai iya badu gawa lalu pulaika menua.

Taja pia ku iya, seninjik bendar pekara nya enda diterima ketuai sida laban iya siku aja anak ari tujuh diri menyadi ke gawa perintah lebuh nya.

PINCHIN GAWA 1991

Pia mega ku iya, Alfred ke gawa berengkah ari pangkat pribit semina ulih megai pangkat Tuai Inspektor sebedau iya pinchin ba taun 1991.

Ku Calvert, apai iya kala diasuh enggau kus ngambi pangkat ke tinggi agi ngambika pinchin iya ila mega tau seriris enggau utai ke dipegai iya, tang enda mujur laban peresa maya nya ngena jaku English.

Ku Calvert nambah, Alfred agi kering ati deka gawa taja umur udah manggai 85 taun.

“Kekadang apai madahka diri ka pulai ngambi senapang, kekadang iya madahka diri takut enggaika ba belakang rumah bisi komunis.

“Kelimpah ari nya, kekadang iya ngasuh aku besedia irauka bisi komunis nerejah ari belakang.

“Enti pagi, bisi aja iya madahka diri ka pulai ngagai kem, bisi nerima kangau ngasuh nurun ngagai patrol. Sinu meda gaya iya diatu,” ku iya seraya madahka diri badu gawa ketegal deka nyaga apai iya nya.

Ba pengujung randau, Alfred ngelalau mensia mayuh, taja menua udah merdeka, tang kita patut ngenang jasa sida ke udah bebendar ngetanka pengelikun menua.

Ku iya, kitai mesti nyaga pengelikun enggau pengelantang menua tu.

“Nembiak rebak baru patut ngasaika sejarah ke udah nyadi ngambika sida tau nemu baka ni pemendar orang kelia kelebih agi bala bujang berani ngetanka menua ari munsuh,” ku iya madah nyemetak.

 

BERITA LAIN

Mayuh bantu ngubah pengidup rayat

DEBAK: Bemacham bansa bantu diberi perintah dikena ngubah enggau nyaga pengelantang rayat. Sapit Premier Sarawak, Datuk Amar Douglas Uggah Embas madah, nya nentuka rayat bulih

Gaji niki nipakka inflasyen

KUCHING: Perintah Besai dipinta nyemela pengawa nikika gaji nipakka tikas inflasyen ngambi pekara tu enda meri empas ngagai rega barang niki ti ngasuh atur nikika

BERITA TERBARU

100 guru berpeluang lihat prototaip ART dari dekat

KUCHING: Seratus warga pendidik berpeluang melihat secara dekat prototaip kenderaan Transit Aliran Autonomi (ART) dalam satu lawatan mereka di sini, baru-baru ini. Delegasi yang terdiri