KPKT meri agih RM3 juta dikena nyungkak ekonomi di Bau

BAU: Opis Menteri Pengawa Berumah enggau Kandang Menua (KPKT) meri agih belanja RM3 juta dikena ngemanahka kandang menua Bau.

Menteri iya, Datuk Zuraida Kamaruddin madahka agih belanja tu diberi ngambika ekonomi peranak menua ba genturung nya ulih ngerembai baka selama.

“Aku udah ninga penerang ari Pemesai Pelilih Menua Bau Anielia Siam pasal perambu sida dalam ngemanahka kandang menua tu nyengkaum Palan Pengerembai Menua Pesisir (RGC) ungkup timpuh panjai.

“Entara pekara ti deka ditambah sida iya nya ngaga palan makai (medan selera) ti disadang ulih dikena ngerembaika ekonomi peranak ba kandang menua tu,” ku iya.

Zuraida bejaku munyi nya lebuh aum pemberita di sebuah kedai makai ditu, kemari.

Berebak enggau nya, Zuraida mega madahka iya bisi ngasuh pemesai pelilih menua tu ngambika meda peluang bukai ungkup dagang temuai ti ulih ngemanahka ekonomi peranak dia.

“Nya alai, nengah agih belanja RM3 juta tu, aku ngarapka raban bekaul ulih ngaga kereja baka ngaga palan makai, nyeruri parit enggau ke bukai.

“Kelimpah ari nya, garis entara menua Bau enggau menua Indonesia mega deka dikemanahka kelebih agi ba Serikin.

“Kitai deka nyeruri palan tu nyadi sebuah palan dagang temuai laban temuai ari menua luar rindu kia lalu pengawa tu dikearap ulih meri pangka besai ngagai ekonomi peranak ditu,” ku iya.

Tandu Zuraida, pengudah dituntung penanggul Covid-19 mayuh rayat lenyau pengawa sereta nutup kedai, tang diatu Perintah Besai udah ngemendarka ekonomi menua dibuka baru.

“Baka palan makai tadi, sida merambu deka muka rumah asap tauka rumah barbekiu, siti chara baru ngerembaika ekonomi di Sarawak.

“Nya alai, aku madahka pengawa tu tau diteruska lalu kami deka meri agih belanja nangkan tu ila dikena mantu rayat ditu.

“Pia mega, bala tuai kampung ti deka nyeruri infrastruktur ba kampung sida baka nyeruri balai, parit enggau ke bukai, sida tau ngiga raban bekaul ngambika ulih diperunding,” ku iya.

Dulu ari nya, Zuraida nyuaka bantu penyampau RM15,000 ngagai Chairman Kunsil Pengatur Sekula SJK Chung Hua Bau Kuan Kim Tian dikena ngaga perabung jalai ari sekula nuju balai sekula.

Sama bisi datai Pemesai Pelilih Menua Bau Anielia Siam enggau ke bukai.

Suara Sarawak