‘Manuk sabung’ Ngasi Sarawak champion Gendang Pampat

MELUGU: Manuk sabung Serakup Ngajat Asal Iban (Ngasi) Sarawak iya nya tim Tajai Bekumbai Ambai mujur ngetanka gelar champion ba Pekit Gendang Pampat 2019 ti diatur ba sekula (SK) Melugu kemari.

Presiden Ngasi Sarawak Ajat Sumoh madah tu ketiga kali serakup nya teulihka gelar champion ba pekit nya.

Iya madah munyi nya ngagai pemberita pengudah abis pekit nya lalu mantaika pengaga ati diri laban udah mujur bulih lumur satu ba pekit nya.

“Berasai temegah asai ati, laban udah bulih gelar champion ba pekit tu.

“Terima kasih mega ngagai bala bakih aku ti udah bebendar belatih ngelama tu,”ku Ajat

Nambah nya ku Ajat, tim iya nadai nyangka diri ulih menang ba pekit tu laban nadai mayuh awak endur belatih.

“Kami sebuat semina sempat belatih tiga bulan aja, nya alai pemujur teulihka champion tu bonus ungkup kami,”ku tandu Ajat baru

Pekit gendang pampat tu diatur ba sekula (SK) Melugu Sri Aman lalu mujur dipejadika Adun Bukit Begunan, Datuk Mong Dagang pagi tadi.

Bisi lapan iti tim ari pelilih menua Melugu enggau Kuching bisi ngambi bagi ba pekit serak tu.

Tim Tajai Bekumbai Ambai mai pulai perais mata duit penyampau RM1500 disempulang enggau trofi, lumur dua tim Lang Tuntung Menaul Burik ari Serakup Gendang Pampat sereta Main Asal Iban Kuching mai pulai perais mata duit RM1300 mega disempulang enggau trofi lalu lumur tiga tim Anak Lemetak Simpang Simunjan ari Simunjan mai pulai mata duit RM1000 enggau trofi.

NGENANKA PENUDUK… Tim Serakup Ngasi Sarawak tiga taun bejurut menggi gelar champion Pekit Gendang Pampat SMK Melugu.
Tim Tajai Bekumbai Ambai

 

LANDIK BEGENDANG… Tim Tajai Bekumbai Ambai benung mandangka pengelandik nebah gendang pampat.