SEBUYAU: Parti Pesaka Bumiputera Bersatu (PBB) deka dulu baum sebedau ngaga pemutus rintai chalun ungkup Pengawa Bepilih Besai Nengeri Ke-12 (PRN-12).
Presiden iya, Datuk Patinggi Abang Johari Tun Openg seraya betundi nyaut tanya pemberita madah, “Aku bedau nganggau baum, anti aku baum dulu.”
“Anti aja, anang ‘gago gilak’ (berumban),” ku iya seraya betundi sentang sekalika penyandang Dun Sebuyau, Asajaya, Sadong Jaya enggau Simunjan deka terus bediri nyadi chalun PRN-12 ti deka diatur enda lama agi.
Iya madah munyi nya ba aum pemberita pengudah pejalai gawa enggau taklimat projek ke benung digaga Ejensi Pemansang Penuh Wilayah Samarahan (IRSDA) di Sebuyau, ensana.
Diatu penyandang sitak Dun Sebuyau iya nya Datuk Julaihi Narawi, Datuk Seri Abdul Karim Rahman Hamzah (Asajaya), Aidel Lariwoo (Sadong Jaya) enggau Awla Dris (Simunjan).
Tebal agi pemikir politik mansutka penemu madah PRN-12 dipelab deka diatur pun bulan tauka tengan Disembr ila pengudah Dun tepadam kena 3 November tu tadi.
Ba aum pemmberita kena 5 November, Abang Johari ke mega Chairman Gabungan Parti Sarawak (GPS) madah raban sida udah baum pasal agih penuduk ungkup PRN-12.
