Pemujur di Thailand, rikod pemadu manah renggat entarabansa Nicodemus, ku Jamil Adam

KUCHING: Nicodemus Manggoi Moses, 29 taun udah teulihka midul emas dalam Pekit Dunya Powerlifting Bangkok, Thailand, ensana.

Pemujur ngujungka rikod Nicodemus nyadi atlit ba ranking ke-12 dunya mujur bulih bulih tikit ke Lumba Paralimpik Tokyo ti deka datai.

Nya alai, jurulatih angkat berat (powerlifting) para Sarawak Jamil Adam madahka tu rikod ke pemadu manah Nicodemus sekumbang nyereta pekit ba renggat entarabansa.

“Pemujur tu mega nyadi peransang ngagai Nicodemus sebedau iya ngulu Pekit Asean Paragames di Hanoi, Vietnam ujung taun tu ila.

“Taja agi napi penanggul pengerekai penyakit Covid-19, aku ngarapka iya ulih terus fokus lalu ngaga pengabis manah,” ku iya.

Nicodemus (kanan) lebuh nerima midul emas nengah lumba angkat berat kategori 88 kilogram di Piala Dunya Powerlifting Bangkok, Thailand, ensana.

Berebak enggau nya mega, ku Nicodemus, iya udah tu deka nyikap diri ngulu pekit angkat berat di Hungary (Hungary World Championship) dikena napatka pejalai nyereta Lumba Paralimpik Paris kena November 2024.

“Aku berasai gaga enggau pemujur tu, terima kasih ngagai bala ti nyukung nyengkaum jurulatih ti udah bebendar ngelatih aku.

“Kelimpah nyikap diri ba Hungary World Championship, aku mega deka nyikap diri ungkup Pekit Asean Paragames di Hanoi, Vietnam kena Disember ti deka datai,” ku iya lebuh dirandau Suara Sarawak, kemari.

Ku iya, pemujur tu deka nyadi peransang dikena iya ngaga manah agi rikod ba lumba angkat berat bukai ti deka datai.

“Aku deka bebendar agi ngulihka pemujur ba pekit ti bukai udah tu ila,” ku iya.

Ungkup rikod, Nicodemus mujur teulihka midul emas tu nengah kategori 88 kilogram pengudah atlit angkat berat Bonnie Bunyau kategori 72 kilogram enggau Bibiana Ahmad kategori 67 kilogram indu mega bulih midul emas ba pekit ti sebaka.

Nicodemus ngalahka atlit angkat berat ari Thailand, Ton Yarnpairat ba penuduk lumur dua enggau atlit ari Iraq, Salam Al Shakakee ba penuduk lumur tiga.

Berebak enggau nya, indai Nicodemus lebu dirandau Suara Sarawak bekaul enggau pemujur anak iya madahka ; “Anang malik ke belakang agi, tang terus maju mansang ke mua.”

Chimbok Akun, 56 taun madahka iya enda ngetu besampi lebuh meda live pekit Piala Dunya Powerlifting Bangkok, Thailand nengah facebook ensana.

“Kami sebilik chukup gaga enggau pemujur iya laban udah teulihka midul emas ba lumba angkat berat kategori 88 kilogram.

“Maya meda live ba facebook, ati aku enda ngetu besampi ngarapka utai ti diangkat iya tau lempung dibantu Tuhan,” ku iya.

Ku Chimbok, Nicodemus anak tuai ari tiga iku diri menyadi lalu nyadi anak ti siruka bala menyadi.

“Enda putus aku meri jaku peransang ngagai iya nengah mesej, facebook enggau lebuh bisi bejaku ba telefon.

“Sepemanjai iya nyereta lumba nya kemari (ensana), aku nyerahka iya ngagai Tuhan ngambika Tuhan ngelindung sereta ngetanka ati enggau tegap,” ku iya.

Ku Chimbok, empas ari pengerakai penyakit Covid-19, sida sebilik enda ulih nganjung Nicodemus bepekit din tang seruran ngulihka berita pemadu baru pasal iya.

“Kami seduai apai iya (Moses Ujat) sigi seruran nyukung pengawa ti dikereja iya nyengkaum dalam bidang lumba angkat berat tu,” ku iya.

Lebuh ditanya sentang perangai Nicodemus, Chimbok madahka iya siku anak ti mentas sereta enda kala nganu bala menyadi.

“Enda kala iya besai jaku enggau bala menyadi nyengkaum ngagai kami duai apai. Iya mega seruran nitihka ajar kami duai,” ku iya.

SERURAN NYUKUNG…Chimbok Akun (tengah) enggau laki iya, Moses (kanan) begambar enggau Nicodemus (kiba).

Suara Sarawak