KUCHING: Beratika penyampau Covid-19 di menua tu agi tubah mayuh dia Komiti Penyangga Penusah Nengeri (JPBN) ngaga pemutus agi nyambung timpuh Atur Mindah Betagang (PKP).
Dalam siti penerang media JPBN madahka, PKP tu dilanjarka lalu Atur Pengawa Standard (SOP) ke udah bisi agi mengkang dititih..
Kelimpah ari nya, nembiak ti deka pulai nyambung sekula ba menua luar dipinta ngaga peminta nerima vaksin tumu awakka sida ulih divaksin dulu.
Ku penerang nya, bala nembiak ulih ngaga peminta ngagai CITF Sarawak nengah emel (citfsarawak@sarawak.gov.my) ti disempulangka enggau penerang diri empu baka nama, lumur tingki, ID MySejahtera, lumur telefon, nama universiti enggau ke bukai.
Berebak enggau nya, penerang tu mega madahka bisi lima buah palan agi deka bejalaika Atur Mindah Betagang Bepekul (PKPD) empas ari pengerekai penyakit Covid-19.
Lima buah palan tu iya nya Rumah Charlee Ujang Sungai Sap Tatau, Kuarters Ling Hock Transport Sdn Bhd Bintulu enggau Rumah Sibat Agang KM5 Jalai Samarakan Ulu Segan Bintulu ke deka bejalaika PKPD berengkah 26 June nyentuk 9 Julai.
Dua buah palan ke bukai iya nya Rumah Jerome Sungai Kesa Sarikei enggau Rumah Jumbun Simpang Koko Sarikei ti deka bejalaika PKPD kena 28 June nyentuk 14 Julai.
