KUCHING: Bisi 11 buah Palan Pemansang Menua Pesisir (RGC) udah dikemendar ditangkan 15 RGC agi benung diperambu digaga dikena mantu 5,000 iku peranak menua pesisir enggau pelilih ti beserimbai.
Menteri Muda Pemansang Tanah Adat, Datuk Roland Sagah Wee Inn mansutka pekara tu lebuh nyaut tanya ari Adun Ngemah-PRS, Alexander Vincent pasal perambu numbuhka RGC ba Ulu Ngemah beserimbai enggau Aum Kelima Renggat Keempat Dun ke-18 ditu, kemari.
Ku iya, tuju penumbuh RGC tu deka meri lima bengkah pengelantang ngagai peranak menua pesisir enggau sida ti diau berimbai enggau pelilih menua tu.
“Keterubah RGC tu ila deka mutarka penanggul pemansut asil menua pesisir awakka ulih diambi enggau lengkas.
“Kedua, RGC tu ila deka ngaga perambu ngemesaika dagang ekonomi menua pesisir enggau meri peluang pengawa sereta ulih ngurangka orang menua pesisir mindah ngagai mengeri,” ku iya.
Roland nambahka tuju ti ketiga RGC tu mega dikena mutarka penanggul rampa menua ngambika ulih nyampur sereta niki ke kualiti idup peranak menua pesisir.
“Tuju ti keempat tu ila mega deka meri pengaga ngagai peranak menua tu ti benung bedagang laban ulih meri sida peluang ngerembaika dagang ngagai mengeri.
“Lalu tuju ti kepenudi RGC tu ila deka muntangka enggau nyaup kereja perintah dalam meri servis penyukung ngagai peranak menua pesisir,” ku iya.
Nangkan ke nya, Menteri Muda Elektrik Menua Pesisir, Dr Abdul Rahman Junaidi madah perintah udah nerima 319 peminta dikena bejalaika Program Belanja Peminta Laun enggau Tambah (ALAF) ari Kampung Lutong ngagai Tudan Desaras Senadin.
Dr Abdul Rahman Junaidi mansutka pekara tu lebuh nyaut tanya ari Adun Piasau-SUPP, Datuk Sebastian Ting Chiew Yew pasal mutarka penanggul nadai karan ba pelilih Kampung Lutong ngagai Tudan Desaras Senadin, Miri.
“Sitak tu udah dikemendarka ba baruh program ALAF lalu nitihka asil pansik isi rumah ba kandang menua tu ila deka disambung kuasa karan ba pengujung taun 2019.
“Sida Sesco bisi ngaga siti skim ti dikumbai ‘Assistant Wiring Scheme’ ti meri peluang ngagai peranak menua tu nyambung tali karan sereta ulih ngaga bayar nyentuk ngagai enam bulan,” ku iya.
Iya nangkan sekali agi minta ketuai genturung pendiau, komiti JKKK enggau sida ti bekaul enggau perintah ngambika mantu peranak kandang menua tu awakka ngaga peminta ba baruh program ALAF enggau lengkas.
