SIBU: Hari krismas patut disambut enggau pengerindu sereta pengasih ngagai pangan diri.

Kaban Kunsil Nengeri (Adun) Tamin Ir Christopher Gira Sambang madah, dua pekara nya nyadika penegap ngagai penyerakup pupu bansa.

“Pia mega, seraya kitai ngintu Krismas kitai ngemeranka ulah bebasa ngagai pengarap bukai laban menua tu nadai nagang rayat megai pengarap,” pia ku iya ngenataika pesan Hari Krismas, sehari tu tadi.

Pia mega, Gira ngarapka mensia mayuh ti betengahka jalai Pan Borneo betatika pengelikun diri.

Iya madah, mayuh endur sekeda endur jalai nya empai tembu.

“Jalai ari Bintulu Sibu lebih agi ba Selangau enggau Arip balat amat jai diatu.

“Ngarapka sama beratika pengelikun diri sepemanjai jalai pulai Krismas tu,”ku iya madah baru.

Gira mega minta rayat ba Dun Tamin lengkas bepadah ngagai Opis Pelilih Menua nyema menua sida ampuh bah ketegal gaya hari ke suah ujan diatu.