SPRM dipinta mansik silik

Charut tanah enggau taukey besai

KUCHING: Penyarut tanah di Kampung Tambirat, Asajaya antara peranak ba genturung pendiau Melayu nya kenyau ari 33 taun ke udah diatu nyadi baru taja udah diputar ba kort.

Siku ari pengempu tanah ti ngarika sida semenua, Ahmad Awang Ali madahka sida udah menang empat kes minta hak ngempu tanah Adat Bansa Asal (NCR) 408 ikar pemesai ba kort sebedau tu.

Taja pia ku iya, serikat Tong Tai Sdn Bhd ti diempu 20 taukey besai diatu datai baru ngachau tanah nya, lalu ngerusak utai tanam nyengkaum sawit peranak dia.

Berindik ari ulah kompeni ti nadai beradat nya, pengempu tanah mansang ke mua ngaga nyauka sepuluh ripot polis ba Opis Polis Asajaya enggau Indu Opis Polis (IPD) Kota Samarahan kenyau ari beberapa minggu ke udah.

Taja pia, nyentuk diatu apin bisi atur udah dipejalai tang nyau peranak menua nya diemba pengereja serikat ngambi enda ngachau tauka ngelaban taukey sida.

Serikat nya mega ku iya berani berimbaka tanah dia laban bedawaka diri udah nerima pemendar ari Opis Tanah enggau Survey (JTS) nyengkaum raban nyaga pengelikun.

“Sida (serikat Tong Tai) madahka tanah tu enggi sida laban bisi pala tanah taja udah empat kali alah ba kort.

“Reti iya, surat pala tanah sida tu udah abis timpuh tauka enda diaku agi,” ku iya lebuh dirandau pengudah ngaga ripot ba Opis Komiti Nagang Pengawa Makai Suap Malaysia (SPRM) ditu tadi.

Kenu ku Ahmad ti mega Chairman NCR Right Defender for Samarahan, tuju iya enggau dua pengempu tanah ke bukai ngaga ripot ngagai SPRM ngambika mansik enti sema bisi pengawa makai suap ba renggat JTS enggau raban nyaga pengelikun bekaul.

NGARAP SPRM MANSIK… Ahmad (tengah) disempulang dua pengempu tanah ke bukai, Samsudin Junit (kiba) enggau Wahab Nong (kanan) sereta bala bukai pengudah ngaga ripot ba opis SPRM ditu tadi.