Atur baru enda nekul pengeransing pengajar ngiri penemu

SIBU: Ubah ba atur ngajar diatu enda sama baka dulu suba tang enda nekul pengeransing pengajar bedua penemu enggau bala nembiak.

Presiden Gerempung Pengajar Sarawak Macky Joseph ti ngenataika jaku Hari Pengajar berambaika Berguru Demi Ilmu, Bina Generasi Baharu’ beterima kasih ngagai perintah enggau Opis Menteri Pelajar Malaysia ke udah nyikap profesion pengajar seririh enggau pematup.

“STU mega meri besai terima kasih ngagai bala apai indai ti bela ngembing anak ngelawa jalai pelajar ke mujur.

“Kitai bela ngemeratka pelajar anak laban sida nyadika ganti megai kitai ba nama-nama pengawa dudi hari,” pia ku iya madah ngagai pengarang berita, kemari.

Iya madah, maya pengerekai COVID-19, bala pengajar balat nangika pekara pelajar nembiak.

“Bepun ari penangi nya, bala pengajar enda belampung ati nampung pengawa ngajar tang nengah online baka whatapps, google sereta mayih chara bukai.

“Nya alai, STU mai semua kitai beterima kasih ngagai pengeransing bala pengajar baka diatu.

“Ketegal nya, jaku madahka enti nadai pengajar, kitai enda ulih nempa pemanah ulah siku-siku, ” ku iya madah baru.

Macky mega madahka pengajar semampai nyikap diri enggau penemu baru enggau pengelandik seririh belajar sepemanjai umur.

“Pengajar deka semampai dipebasa enggau gelar ‘pengajar’ seumur idup. Terima kasih pengajar,” pia ku iya.

Suara Sarawak