Bantu tusu tepung berengkah disadung di Saratok

SARATOK: Agih bantu tusu tepung (formula) ungkup nembiak mit udah berengkah disadung di sitak Parlimen Saratok kemari.

Sapit Menteri Pengeluar Kuasa enggau Pengeraja Asal, Ali Biju madah tuju bantu nya dikena ngelempungka tating belanja ruang bilik ke bisi anak mit sekumbang Atur Tagang Pejalai (PKP) diteritka perintah.

Ku iya, bantu nya diberi ngagai ruang bilik ke bisi anak mit biak ari enam taun lalu pengawa nyidi ruang bilik ke bisi anak mesai nya chakah dipejalai sebedau tu.

“Aku naka ulih mantu raban ti tusah kelebih agi sida ti suntuk belanja ketegal putus pengawa tang mayuh anak dipelanja nyengkaum belanja tusu tepung.

“Sedarka penusah ditapi sida, kami ba palan servis ditu berundingka chara ulih mantu sida, abis nadai belanja meli tusu tepung lempung agi, “ ku iya ti mega Kaban Parlimen Saratok.

Ali mansutka jaku nya nengah pengari iya ari Palan Servis Komuniti Sitak Parlimen Saratok lebuh nganjung bantu susu ngagai penerima ba Kampung Tanjung ditu, kemari.

Ali madah, bantu tusu tepung tu sebagi ari inisiatif dipejalai iya empu dikena nulung rayat lalu nengah saup raban ba palan servis iya dia.

Nambahka nya, bantu disadung ari genturung pendiau ngagai genturung pendiau ke bukai tauka ari rumah ke rumah dikena nyeliahka penanggul kelalu sekut enggau kelalu mayuh tubuh begempuru ba siti endur.

“Pekara pengelantang rayat endang semampai dikemerat enggau diberi perati lalu aku naka ulih mantu rayat ke tusah,” tandu iya.

Adun Krian nya mega ngarapka bantu nya ulih meri pengelantang ngagai bala penerima taja penyampau bantu nyangka nadai mayuh.

Ungkup penerang, lebih 2,000 iku nembiak mit beumur enam taun enggau biak agi selampur Saratok deka ampit bantu nya ti deka diberi chara berenggat.

Suara Sarawak