Beserakup ngemansangka Sarawak

“Semina kitai ba Sarawak aja nemu nama pekara ke diguna Sarawak.”

BATU KAWA: Kepala Menteri (KM) Datuk Patinggi Abang Johari Tun Openg sehari tu (kemari) bekunsi pengerami ngintu hari pengada iya ke-69 enggau komuniti ba genturung pendiau Semeba, ditu.

Pengerami nya diintu sekali enggau pengawa bejadika Gempung Parti Sarawak (GPS) Zon 2 iya nya ba sitak Batu Kawa.

Ku Abang Johari, tiap iku rayat Sarawak patut beserakup dalam ngemansangka nengeri tu.

“Semina kitai ba Sarawak aja nemu nama pekara ke diguna Sarawak.

“Kitai patut bebendar ngetanka Sarawak lalu ari pekara nya mih ke nyadi perais rayat ngagai aku sekali tu,” ku iya.

Abang Johari madah munyi nya lebuh bejaku ba pengerami bejadika GPS Zon 2 di Dewan Serbaguna Kampung Semeba, Batu Kitang ditu, tadi.

Berebak enggau nya, iya ti mega Presiden GPS madah penatai mensia ti chukup mayuh ngagai pengerami nya sekali tu nunjukka mensia mayuh ba Zon 2 nemu pekara ke dipejalaika GPS ngagai Sarawak.

“Setaun GPS udah ditumbuh, kitai nadai tetemuka sebarang penanggul ti besai dalam ngemansangka Sarawak.

“Kitai semina fokus ngagai pemansang di Sarawak laku kita ngembuan agenda kitai empu dalam ngemansangka nengeri tu,” ku iya.

Abang Johari mega madahka Sarawak enda nitihka menua sepiak ti semina belaya enggau parti diri lalu nadai fokus ngagai pemansang menua.

“Orang bukai bejaku aja ke mayuh tang nadai dipeda pekara ke disebut.

“Pechaya mih dalam timpuh lima ngagai 10 taun deka datai kitai deka nyadi nengeri ti ngembuan pemansang mampan nitihka dunya kemaya hari,” ku iya.

Pengerami bejadika GPS Zon 2 nya sama digulu mensia mayuh ari sitak Padungan, Pending, Batu Lintang, Kota Sentosa, Batu Kitang enggau Batu Kawa.

Sama bisi ngulu pengerami nya Sapit Kepala Menteri Datuk Amar Douglas Uggah Embas, Presiden Parti Rayat Sarawak (PRS) Tan Sri James Jemut Masing, Ketuai GPS Zon 2 ti mega nyadi Presiden Parti Sa’ati Rayat Sarawak (SUPP) Datuk Dr Sim Kui Hian, ketuai-ketuai parti komponen GPS, pengari rayat enggau ke bukai.

BEJADI GPS ZON 2… Abang Johari (tiga ari kanan), Ketuai GPS Zon 2 ti mega nyadi Presiden SUPP Datuk Dr Sim Kui Hian (tengah), Sapit Kepala Menteri Datuk Amar Douglas Uggah Embas (dua ari kiba), Sapit Kepala Menteri ti mega nyadi Presiden PRS Tan Sri James Jemut Masing (tiga ari kiba) sereta pengari ke bukai lebuh bejadika GPS Zon 2 tadi.. -Gambar NADIM BOKHARI