Bonnie menang emas di Thailand

KUCHING: Juluk ati Bonnie Bunyau Gustin dipilih bepekit ba Lumba Paralimpik Dunya di Tokyo 2021 udah nyadi nyata.

Betambah manis agi, udah iya menang midul emas ba Pekit Mangkuk Dunya Angkat Berat (Powerlifting) Para Dunya di Bangkok, Thailand, ensanus.

Peranak Kuching beumur 20 taun mega mujur nempa rikod baru lalu madam rikod iya empu ba pekit Powerlifting 226 kilogram (kg), Kategori Lelaki Atas 72 kg.

Sebedau tu, Bonnie kala ngaga rikod ngangkatka 207 kg lebuh bulih dua midul emas ba Pekit Angkat Berat Para Dunya di Kazakhstan taun 2019.

Ba pekit lebuh nya, iya ngalahka Champion Paralimpik London 2012, Nader Moradi ti bulih midul pirak (204 kg) enggau Alexandr Daskov ari Kazakhstan ba lumur tiga (140 kg).

TEMEGAH… Bonnie Bunyau Gustin mujur ngemasukka diri ba Pekit Paralimpik Tokyo, pengudah bulih emas ba Pekit Mangkuk Dunya Angkat Berat (Powerlifting) Para Dunya di Bangkok, Thailand, ensanus.

Pemujur atlit menua nya nunjukka iya chukup regas enggau endang udah nyikap diri enggau bepekit ba Paralimpik Tokyo ti ditaga kena 24 Ogos taun tu.

Tu mega nyadika peransang ngagai Bonnie empu, kelang endur iya ngesaika ‘bulu siga’ anak Dayak ba tikas dunya, mandangka atlit paralimpik mega bisi potensi ngemegahka nama menua.

Jurulatih Angkat Berat Menua, Jamil Adam madahka Bonnie ngembuan prestasi ke chukup manah maya tu dikena nyikap diri ba pekit Paralimpik Tokyo ila.

“Iya (Bonnie) naka diatu udah ba ranking lumur satu dunya ba Kategori 72 kg, ranking Tokyo.

“Taja pia, ranking nya deka diputuska baru sepengudah Mangkuk Dunya Powerlifting Para 2021 Fazza Dubai ke-11 ila,” ku Jamil nerang.

Ba lansa sama, Komiti Paralimpik Malaysia nengah laman Facebook bela ngenataika pengaga ati sereta meri tabi puji ngagai Bonnie laban udah mujur bulih emas enggau ngemegahka nama menua.

Menteri Nembiak enggau Lumba Datuk Seri Reezal Merican Naina Merican mega bisi ngenataika pengaga ati ngagai Bonnie enggau dua iku atlit para ke bukai ti sama bulih midul ba pekit nya.

“Meri tabi puji ngagai Bonnie Bunyau enggau Bibiana Ahmad ti udah bulih midul emas sereta Sona Agon bulih engkeraju ba Pekit Mangkuk Dunya Powerlifting Para Dunya.

“Siti agi berita gaga ngagai menua kitai. Pajuka singkang kita tiga ungkup pemansang lumba menua lalu ulih nyadi peransang bala bukai,” ku Reezal Merican nengah akaun Twitter iya.

ENDA MANTUL NGAPA… Bonnie ngena pengabis tulang iya ngangkatka besi pemerat.

Bonnie ngepunka singkang nyadi atlit lebuh umur manggai 15 taun, endang ditemu siku orang ti puh ngansah penau enggau liat ati napi sebarang pemar.

Iya nadai kala mantul ngapa dataika nama iya diatu dikelala nyadi siku ari jaguh angkat berat dunya sereta dibasa enggau Anugerah Atlit Para Pemadu Nyulut 2019.

Bonnie entara empat atlit ti dirintai ba kategori Atlit Para Pemadu Nyulut ba pengerami nyuaka Anugerah Serakup Pengarang Lumba Malaysia (SAM)-100PLUS 2019 di Bukit Kiara, kena 1 September 2020.

Atlit ari lumba Powerlifting tu mega udah mechahka ‘dominasi olahraga’ lebuh dipilih nerima anugerah nya lalu nempa sejarah kediri empu ba dunya lumba para.

“Aku meri besai terima kasih ngagai SAM laban ulih milih enggau meri anugerah tu. Endang nadai nyangka deka dipilih nerima anugerah tu taja bala pemekit bukai endang orang ti beberita, jelai nama.

“Anugerah tu deka nyadi peransang aku enggau bala bakih bukai ngangkatka lumba para menua ngagai tikas entarabansa,” ku Bonnie mantaika pengaga diri nengah panggil Video lebuh nerima berita nya.

Tiga iku bakih ti sama dirintai ba anugerah nya; S Suresh enggau Wiro Julin ari lumba nimbakka laja enggau Muhd Ziyad Zolkefli ari lumba olahraga.

Suara Sarawak