Chara meri anak nama

APAI Indai bempu tanggungpengawa besai lebuh meri nama anak laban nama nya deka mai iya sekalika tebilang, pandai sereta mereti.

Jeman diatu, apai indai suah begigaka nama anak ba bup baka Bup Kudus tauka bup bukai.

Pia mega, sekeda kitai bansa Iban suah ngangkatka nama aki ini kelia ngambi gayu sereta manah ulah baka tudah diangkatka nama nya.

Nama dipilih mega tentu bisi sejarah enggau kebuah iya empu sekalika kering tauka nelap.

Nya kebuah, kitai suah ninga apai indai meri nama anak sida Endawie, Saban, Kendawang, Jelemin, Kechendai, Bilun, Ujai, Ampoi, Beti ba kandang menua Krian tauka Sungai Saribas.

PANGKUNG TAWAK… Tawak dipangkung kena mampul pending awakka enda ninga bunyi burung manah tauka jai lebuh pengawa meri anak mit mandi dikereja.

Seraya nama Jugah, Tedong, Gerinang, Muahari, Jinggut, Bangau, Belayong, Selan enggau Sibat suah didinga kadap menua Sungai Rajang.

Tang jeman diatu, nama baka nya jarang didinga laban sida suah ngiga enggau nunda nama ari Bup Kudus baka Edward, John, James, Paul or Peter ungkup nama anak lelaki lalu Mary, Elizabeth, Alice tauka Margaret ungkup nama anak indu.

Apai indai bansa Bidayuh ba kandang menua Serian enggau Bau suah meri nama anak ti panjai sereta mar disebut kitai baka Macdonald, Macalister, Maxwell, Macmillan, Montgomery, Bartholomew, Macarthur enggau ke bukai.

Taja pia, nadai ga kala ninga bala apai indai meri nama anak sida baka Macbeth tauka Shakespeare lebuh aku ba Kanowit enggau Julau tang suah ninga nama baka Thomas Jeffersons, John Kennedys, Henry Kissingers enggau Winston Churchills ungkup anak lelaki.

Ukai semina nya aja, bisi apai indai meri nama anak sida pandak aja baka hari anak nya ada iya nya Satu, Jemat tauka Minggu lalu ba bansa Melayu bisi ngaga nama anak Khamis, Jumat, Sabtu enggau Ahad.

Nyamai amat nyebut nama anak enti baka nya lalu engka bisi kebuah sida ngaga nama baka nya tauka bisi utai nyadi ba hari anak sida ada.

DISUNGGA… Anak mit deka disungga ba ai sungai seraya bala bukai richah amat ngemataka pengawa nya.

Bansa Iban suah agi meri nama anak sida bepelasarka utai ke nyadi ba hari anak ada. Ambika banding baka anak menyadi aku diberi nama Bala enggau Gata mai reti bala ti begempuru lebuh pengerami Gawai enggau Gata ti ada lebuh Regata Saratok.

Menyadi tuai aku meri nama anak kedua iya, Jokerson Jembu laban anak iya ada lebuh main daun terup enggau bala bukai lalu nama Jembu nya ngangkatka nama aki iya ti tebilang sereta mayuh pengelandik.

Bisi mega nama nya salah tulis kerani ba Opis Pengerejister Bansa baka siku Kepala Pengajar ba Kanowit ke benama Ranggi tang salah tulis lalu nyadi Hangih tang manah ga nama nya laban dilah orang Sibu enggau Kanowit tilur nyebut ‘R’.

Lebuh agi gawa nyadi pengelicha suba, aku kala ninga nama pelatih lelaki benama Bonaventure, Helikopta, Propella, Sapanama, Menalan enggau ke bukai.

Kelimpah ari nya, apai indai bansa kitai Iban mega suah meri nama anak ngangkatka bujang berani orang Panggau Libau baka Keling, Laja enggau Sempurai.

Nama Orang Panggau Libau tu endang beberita ba sejarah bansa Iban lebuh menua agi siga kelia kelimpah sida tu kering, kempang enggau berani ngelaban munsuh enggau suah ngayau pala munsuh.

Enti nama indu, sida suah ngangkatka nama Kumang enggau Lulung laban dua nama nya endang ditemu indu ke bajik sereta pandai ba tunjuk jari.

Bisi mega meri nama Telajan diambi ari sejarah anak Keling, Telajan Nempap Bungkung Tumpur Anchur Nyadi Emperan, Tedung Nyengkung Mantuk Melit Iku Bebelit Dalam Bulan.

NGAGA NAMA ANAK

Nyadi kelia Iban enda beguai ngaga nama ka anak, sekumbang anak nya agi mit nya dikumbai ulat, sekalika anak lelaki tauka indu.

Nitihka adat Iban kelia, apai indai suah ngangauka kaban apai indai enggau aki ini bilik sepiak ngambika ngiga nama aki ini ke udah nadai lalu sida nya ditemu ngembuan ulah ke manah lebuh ngiga nama anak sida ke baru ada nya tadi.

Sida suah ngangkatka nama aki ini tauka apai indai ti udah ngadaka anak nya enggau kaban belayan bukai tang sida nyeliah ari milih naka aki ini ti jai pemati baka mati gila, mati munuh diri, mati labuh tauka ke bukai.

Udah nama dua tiga iti dipilih nya, dia sida lalu numpukka asi nitihka pemayuh nama ti kena pilih tadi.

Tumpuk asi nya diengkah ba atas papan nitihka nama ke udah dipilih lalu ngasuh manuk mantuk nama ke udah ditaga ba asi tadi enggau ni bagi asi ke dipantuk manuk nya mih dipilih nyadi nama anak mit tu tadi.

Nya alai, bala apai indai ngarapka nama anak nya deka pulaika pemanah ngagai anak sida, deka pandai, landik enggau manah ulah maya udah besai ila kelimpah ulih ngetanka menua sereta tebilang nama.

Adat baka tu patut ditan laban tu sebagi ari penatai bansa Iban sereta adat tu ngelaika bansa kitai bisi rurun meri nama anak enggau adat bukai ba pengidup bansa kitai laban kitai tu deka ngingatka adat,bngingatka sempekat, ngingatka tanda, nirika bansa, baka wi tampung tali, baka rutan tampung danan, baka tengang tampung belembang.

Lebuh orang nyunggaka anak mit dia orang ke ngemata ka richah amat taja tawak enda tentu dipalu inggar lebuh nya tang nembiak ti deka malu nya enda ditagang ngambi bisi mampul pending awakka enda ninga bunyi burung manah tauka jai enti bisi bemunyi.

Udah anak nya diberi mandi, enti anak mit nya lelaki sayap manuk sepiak ditanchang ngena ubung mansau lalu dituatkaba baur berayang.

Enti iya indu laletan ga kena orang nuatka sayap manuk lalu semak sayap manuk nya tadi di engkah ka orang piring siti atas kelingkang digantung orang ari puchuk buluh agi bedaun.

Tembu pengawa ba ai, orang lalu pulai ke rumah. Sida ka pulai tu beripih baru baka ke mansang tadi enggau agi dilagu enggau gendang enggaika ninga burung.

Datai sida di rumah anak lalu dipangku indai iya dibai duduk atas tawak ba tengah ruai dibap enggau pua kumbu awakka ditatap enggau ai.

Udah tembu natap anak seduai indai enggau ai penchelap nya baru orang makai penganan, tuak arak enggau mayuh bansa pemakai dikemisi pengempu pengawa nya lalu maya tengahari, sida deka belabuh makai ba ruai lalu pengawa tu dikumbai makai diruai meri anak mandi.

Suara Sarawak