KUCHING: Sekretari Besai Nembiak Parti Rayat Bersatu Sarawak (SUPP) Milton Foo minta Parti Tindakan Demokratik (DAP) mantaika penerang bekaul enggau Tuai Pemegai Menua Tuan Yang Terutama (TYT) Yang di-Pertua Tun Pehin Seri Taib Mahmud ti dipadah salah ba pengawa makai suap enggau salah nguna kuasa.
Milton madah, pinta ari DAP Sarawak ti minta Opis Pengawa Nagang Makai Suap (SPRM) muka baru pansik ngagai Taib nya enda patut laban sida nadai penerang pemadu baru ti nyemetak.
“DAP Sarawak semina nemu nunjuk jari ngagai TYT bekaul enggau penyalah nya.
“Tu nadai tuju bukai, semina ngulihka guna politik sida aja.
“Sida patut mantaika penerang baru ti nyemetak,” ku iya rambau aum penerang berita ba Indu Opis SUPP, kemari.
Milton madah pansik ngagai kes Taib nya udah lama digaga sebedau tu tang nadai pengawa bedawa iya.
Nambahka nya, sebengkah infomasyen ke baru ti diberi nadai bida enggau pansik ke udah digaga sebedau tu.
Kaban Parlimen Bandar Kuching Dr Kevin Yii ba parlimen apin lama ke udah nanya enti sema SPRM deka muka baru pansik ngagai Taib enggau orang ke semak enggau iya bekaul enggau penerang baru ari Bruno Manser Fund enggau Sarawak Report.
Taja pia, Menteri ba Opis Menteri Besai (Pekara Undang-Undang) Liew Vui Keong madah Luyar Menua Tommy Thonas udah ngaga pansik kes ngagai Taib lalu mutuska nadai dawa ngagai iya.
Mayuh pansik udah digaga ngagai Taib ari taun 2015 tang nadai atur diterit digaga ari piak ke patut laban kurang penerang.
