Dity ngarap dagang produk kraf jari terus ngerembai

KUCHING: Program Agenda Warisan Pintar Old Kuching 2019 dipejalaika pengelama seminggu kenyau 25 ngagai 31 March tu beratika mayuh palan eksibisyen dibuka ba palan nya.

Dity Jong, 46 taun ari Klauh, Simanggang enda tinggal mega ngambi bagi ba pengawa nya begulai enggau ipar iya bejual asil kraf jari nyengkaum selampai manik enggau selampai tusuk.

“Aku berengkah ngaga pengawa tu suba sigi nadai belajar ba orang bukai, semina ari pengeran ati diri empu.

“Keterubah aku ngaga suba, aku mina ngaga ‘cross-stitch’ baka ke suah digaga orang bukai tang mayuh amai penyilap gaga ku lebuh mula enggau ngaga utai tu,” ku Dity.

Tang nya enda nyadi penanggul ba iya badu tauka putus pengarap ngaga ke baru enggau manah agi.

NUSUK… Dity benung nusuk selampai ke dipinta penguna.

“Udah nya aku nguji ngaga ngena ukir burung ruai, baru aku nemu baka ni chara ke manah kena ngaga nya.

“Ari nya meh aku berengkah rindu ngaga selampai tu enggau pengawa manik ke bukai,” ku iya.

Lebuh dirandau, Dity madah laban ke geram sereta rindu ke pengawa nusuk manik enggau selampai nya, nya alai nadai lama iya nembu ke siti selampai ke dipinta bala orang ke meli.

“Keterubah ku ngaga suba endang nadai runding deka nyual, semina disimpan rindu ati aja.

“Laban ke nadai pengawa lebuh diau ba rumah, nya alai aku lalu ngaga pengawa nusuk manik tu,” ku Dity.

NYAGA… Dity nyaga palan eksibisyen sida ke dikumbai Iban@Racer.

Mayuh bala kaban lebuh nemuai ke rumah meri peransang ngagai aku madah asil ke gaga ku nya manah, lalu enti bisi orang ka meli, aku sigi nyual, ku iya nambah.

Nangkanka nya, Dity madah asil tusuk ke udah tembu digaga iya dikemisi iya enda mayuh.

Nya kebuah iya semina nyual naka dikemisi iya, lalu enti sema bisi orang minta iya ngaga, iya deka ngaga sereta nyual asil nya ngagai orang.

Nambah ka nya mega, Dity madah lebuh ngaga manik nya, iya deka milih manik ke manah dikena.

“Kebuah pia, laban diatu mayuh manik enda sebaka pemesai lalu churak mega enda sama.

SELAMPAI MANIK… Siti ari asil jari digaga Dity.

“Enti deka bulih asil ke manah, manik paling manah dikena nusuk tauka ngaga selampai tauka marik iya nya manik dikumbai orang manik ari Jipun,” ku iya.

Kelimpah ari nya, Dity madah siti selampai dijual iya ngena rega RM300 lebih siti laban perengka lebih agi rega manik ke mar sereta pemar ari ngaga manik nya.

“Naka dua hari program tu udah dipejalai, bisi mega orang udah ngelawa palan eksibisyen kami sereta meli bakul enggau gelang.

“Asil ke bisi ba palan tu diatu bisi nya digaga entua enggau laki aku empu,” ku Dity lebuh dirandau.

Dity madah mayuh utai tauka asil jari deka digaga iya tang ketegal ari penanggul enda chukup awak, nya alai iya semina ulih ngaga ni naka ke ulih aja.

Ngepunka pengawa ngaga asil manik ari taun nyin kemari, Dity ngarapka diri empu ulih ngemesaika sereta nyual asil jari iya ngagai menua bukai.

BAKUL… Bakul digaga entua Dity.

 

Duku… Siti asil jari digaga laki Dity empu.

Suara Sarawak