Gelar Kumang Saratok 2019 diperebut 25 Mei

SARATOK: Indu dara di pelilih menua tu ditesau nyereta Pekit Kumang Gawai Saratok 2019 ke deka diatur lemai 25 Mei tu.

Sida ke beumur entara 16 ngagai 28 taun peranak asal Saratok tauka sida ke udah diam mendam bela diperansang nyereta pekit deka diatur di Rumah Anchang di Sungai Muding, Sebetan di Saratok berengkah ari pukul 6.30 lemai.

Atur pengerami ninting taun tu mega nyendiaka perais chukup manang ngagai sida ke bulih gelar Kumang, Lulong enggau Selinggar Matahari nyengkaum perais sagu ati ngagai tujuh iku pemekit bukai sereta Anugerah Ngepan Asal Pemadu Manah.

Gelar kumang deka pulai ngemai perais mata duit penyampau RM2000 disempulang enggau trofi, bungai jari, selampai Kumang, mockup chek, hamper enggau setipikit.

Penuduk lumur dua tauka Lulong deka nerima RM1500, Selinggar Matahari nerima RM1000 bela disempulang trofi, bungai jari selampai, mockup chek, hamper enggau setipikit lalu penuduk lumur empat enggau lima nerima RM200 siku sereta hamper enggau setipikit.

Seraya perais sagu ati penuduk lumur enam nyentuk sepuluh bela nerima mata duit RM100 siku disempulang hamper enggau setipikit lalu Anugerah Ngepan Asal Pemadu Manah deka nerima RM500.

Hari bulan kepenudi nganjung pom pekit iya nya sehari tu, 22 Mei urung pukul 12 tengahari lalu penyereta pekit tu nadai bebayar.

Temuai dipebasa ke lalu nyadi Tuai Pengabang Pengerami Mantar Gawai Dayak iya nya MP Saratok Ali Biju disadang datai bejadika pekit enggau pengerami lemai nya.

Tanya enggau penerang silik pasal pekit tau betanya nuju komiti pengatur iya nya Glen Anthony 011-1919 3690, Wat Laga (013-575 4133) enggau William Barang (013-563 5634).

MULAIKA PENGINGAT… Ali Biju nyuaka perais ngagai siku ari pemansang Pekit Kumang Gawai Dun Krian 2016 seraya dikemata bala bukai.

Suara Sarawak