KUCHING: Kaban Gempung Parti Sarawak (GPS) dipinta anang telunga-lunga pengudah menang ba Pengawa Bepilih Nengeri Ke-12 (PRN-12) tu tadi.

Adun Dudong, Datuk Seri Tiong King Sing minta raban GPS anang telunga pengudah menang tang terus gawaka rayat enggau manah.

“Tuai genap penuduk mesti terus gawa enggau manah ungkup rayat menua.

“Nadai ngira ari sitak ni pen, kita mesti gawaka rayat lalu ngubah gaya pengidup sida,” ku Tiong madah nengah sebengkah penerang sehari tu tadi.

Ku Tiong, taja tuai nadai ulih gawa 100 peratus terubah iya tang sida mesti sikar agi bejalaika pengawa.

Nambahka nya, iya mega madahka peratus nurun ngundi lebuh PRN-12 tu nurun.

Tiong mega madah, peratus nurun ngundi maya PRN-12 Sarawak apin lama nadai entu tinggi.

Nerang silik, iya madah enti dibanding peratus nurun ngundi maya pengawa bepilih 2016, bisi 70.01 peratus nurun ngundi dibanding peratus nurun ngundi serak tu ke semina 60.67 peratus.

“Nama utai dikerunding pengundi? Sekalika sida takut ke Covid-19 tauka nganti enggau beratika pejalai GPS?

“Tauka engka enti GPS alah lalu sida nadai ngundi maya pengawa bepilih tau ngasuh sida nadai ngasaika diri salah maya ngundi,” ku Tiong nyemetak.