Kuching: Siku mekanik ari Bintulu rugi RM32,350 lebuh ti deka ngaga pinjau duit nengah siti serikat ti ditemu ari Facebook.

Ketuai Opis Pansik Penyalah Komersial Polis Sarawak, Supt. Mustafa Kamal Gani Abdullah madah lelaki Iban ti beumur 36 taun, gawa mekanik nya tepedaka iklan pinjau duit ari Facebook kena 16 March tu tadi.

“Lelaki nya terus berandau enggau siku lelaki ke nyendia iklan nya ngena ‘whatsapp’ madah ke diri deka ngaga pinjau duit penyampau RM40,000. Lelaki nya madah ke diri mangku pengawa nyadi eksekutif pekara wang ba serikat nya.

Udah nya, orang ke nipu nya madah enggau iya ulih ngaga pinjau duit tang meseti dulu meri bayar dulu dikena ngerejister diri, bayar chengkeram enggau mayar luyar.

Mansa ngaga bayar penyampau RM32,350 ngagai enam iti akaun orang enda dikelala ngena nama ti bebida nengah 11 kali ‘transaksi’ belabuh 17 March 2019.

Kenu ku lelaki nya, iya bulih duit dikena mayar orang ke nipu nya asil pinjau ari bala bakih iya,” ku Mustafa.

Iya nemu diri kena tipu meda duit ti dipinjau lalu enda diterima sereta orang ke nipu nya nyau majak minta duit.

Nya alai, mensia mayuh dipinta bejimat lebuh meda iklan enda menuku ba Facebook nangi meri pengerugi ngagai diri empu.

Anang enda jera bekaul enggau mayuh kes udah nyadi ketegal tepapa minjau ari institusyen wang ti enda sah.