Meri penerang ukai pekara tau dimain

Perintah udah ngaga pemutus ngemendarka sekeda sektor ekonomi bejalaika operasyen sida berengkah 4 Mei tu tadi bepelasarka Atur Pengawa Standard (SOP) ditetapka sekumbang timpuh Atur Tagang Pejalai Besyarat (PKPB).
Tu nyengkaum bala penguna enda tau enda ngisi penerang baka nama enggau lumur telefon sebedau tama ngagai sekeda kedai ungkup pengelikun semua. Taja pia, bisi sekeda nadai tanggungpengawa lalu enda nitihka atur ti udah ditetap.

Suara Sarawak minta penemu mensia mayuh pasal pekara tu lalu meri buah runding baka ni ngemanahka atur nya ngambi ngasi agi.

Novert Sullang
Saratok “Kebendar, bejalaika SOP baka tu patut bisi kerejasama rat ejensi bukai nyengkaum serikat telekomunikasyen enggau Komiti Komunikasyen enggau Multimedia (SKMM) nentuka penerang diberi nya betul. Piak pengempu premis mega patut minta penguna mantaika tingki sida lebuh ngisi penerang. Ambika chunto baka atur sebedau kitai dikemendar tama ngagai bilun, dipinta mantaika pas penerebai enggau tingki.”

 

Sangin Juat
Julau “Lebuh atur perintah minta kitai ngisi penerang, nya ukai pekara ke tau dimain. Ukai ngajihka rangkang ngachuk mata tang kati enti palan dilawa kitai nya bisi kes dirampit Covid-19, bakani sida begiga ka kitai? Nya alai kita mensia mayuh patut bisi tanggungjawab. Tu siti ari pangku pengawa kitai nentuka pengelikun semua. Chara kitai beterima kasih mega ngagai perintah ti udah ngelunggarka atur PKPB.”

 


Ricky Donald Berji 
Limbang
“Mensia mayuh patut mantaika tingki ngagai pengempu kedai dikena nyeliah penerang bula kelimpah meri lumur telefon ti betul. Ambika chunto, tau minta sida nunjukka laluh kredit nengah aplikasyen telefon nya. Kitai enda tau enda meri kerejasama rat ngagai piak Opis Menteri Pengerai Malaysia (KKM) enggau perintah nentuka Covid-19 tu jampat pukas. Kitai patut berundingka pengelikun diri empu enggau orang bukai bepanggai ba ulah ti ngasika atur dipejalai nya. Pengempu premis mega tau ngelekat CCTV ba mua Kaunter dikena matau pejalai bala penguna.”

 


Madiana Sagai
Bintangor
“Ba penemu aku, manah agi pengempu kedai nya ngisi penerang mensia mayuh ke datai nyeliah sebarang ulah meri penerang bula. Tambah mega, ukai semua orang ke datai nemu nulis kelebih agi sida ke tuai ba kandang menua pesisir. Atur dipejalai perintah tu endang engkeman dikena nyaga pengelikun semua kitai. Taja pia, pengawa beberika nama, lumur telefon enggau lumur tingki mega bisi penangi bukai kelebih agi diatu mayuh kes nipu nyadi. Nya alai, kerejasama semua piak patut bisi nyeliah sebarang penanggul dudi hari.”

 


Sang Sanjan
Kuching
“Baka diatu PKPB nyau baka udah datai ba pengujung. Kebuah pia laban dipeda mensia mayuh nyau nadai betatak pansut, semina ke enda sebaka ngau ti enda disekat baka ngelamatu aja. Nya kebuah ba aku, SOP patut terit agi dipejalai kelebih agi ba premis nentuka igi penyakit Covid-19 tu enda ngerekai baru baka ke udah. Ambika chunto, atur baka beperesa pengangat isi, ngena sengkabung mua ditambah enggau SOP ngisi penerang diri tu patut dikemata nentuka penguna bela ngasika atur nya. Enti ulih anang guai bebaika bala anak mit pansut belah pasar ti nadai tentu kebuah ke bebatang.”

 

Korina Mang
Kanowit
“Lekatka CCTV ba endur mensia mayuh dipinta ngisi penerang ngambika sida bisi berasai nangi enti sema meri penerang bula nyengkaum ba pintu penama. Nangkan nya, ejensi enggau piak bekaul patut matau enggau meretika agi pekara ngaul penerang bala penguna nentuka nadai piak beambi ulih ari penerang ke diberi. Semua tu dikena kitai nentuka pejalai SOP lanchar sereta nyaga pengerai mensia mayuh.”