MESTR dipinta besaup napi tiga pemar besai

KUCHING: Opis Menteri Pelajar, Sains enggau Pansik Teknologi (MESTR) dipinta sama besukung enggau nempa kaul rat dikena nyikap diri napi pemar jemah.

Menteri iya, Datuk Sri Michael Manyin Jawong madahka bisi tiga bengkah pemar besai deka ditapi ti begunaka kerejasama rat semua raban ba MESTR.

“Keterubah, opis menteri kitai deka bejalaika pengawa ngajar subjek Matematik enggau Sains ngena jaku English.

“Semua unit kitai deka begunaka sukung bala apai indai, pengajar enggau belanja nentuka juluk tu mujur nyapai tagit,” ku iya.

Manyin mansutka jaku nya lebuh bejadika Pengerami Malam Gawai Raya enggau Anugerah Servis Nyulut (APC) MESTR ba sebuah hotel tebilang ditu, ensanus.

KE PENGINGAT… Manyin (tujuh kiba), Dr. Annuar Rapa’ee (enam kiba) begambar bebala mayuh enggau bala staf MESTR.

Iya madah nyemetak pejalai atur ngajar dua subjek ngena Jaku English enda tau puntan ngapa.

“Pengawa tu enda tau puntan laban enti kitai ditu puntan, selampur Malaysia enda tepujurka juluk tu dudi hari,” ku iya madah nyemetak.

Pemar kedua ku iya, lima buah sekula peribit sebedau tu di baruh kuasa Perintah Besai deka betukar di baruh opis menteri sida.

“Sebuah di Miri, sebuah di Bintulu, sebuah di Sibu enggau dua buah di Samarahan.

“Kesemua sekula peribit tu ila deka meri kitai asil ti manah laban bisi dua renggat makmal ti deka nyamin kualiti pelajar,” ku iya.

Kepenudi bekaul enggau pengawa numbuhka Palan Besai Sains (Sains Centre) udah dikemendar ba Kabinet.

“Palan Sains tu deka ngambi perunding ari Singapore ti meri sanding penemu enggau ngajar penau pasal sains ngagai bala nembiak.

“Kesemua pekara tu ditaga mar ditapi opis menteri kitai laban agi baru sereta bedau kala dipejalai sebedau tu,” ku iya.

Taja pia ku iya, sida nangkup kesemua pemar tu ngambi ulih meri pemaik ngagai Sarawak.

Berebak enggau nya, Manyin bisi nyauka setipikit APC ngagai lapan iku staf MESTR ti nyulut ba servis sida.

Sama datai Menteri Muda Pelajar enggau Pansik Teknologi Dr Annuar Rapa’ee, Sekretari Mendam MESTR Datuk William Patrick Nyigor, Mandal Sekretari Mendam MESTR Dr Abdul Rahman Deen enggau ke bukai.

Suara Sarawak