Mulai kenang Pasar Kaki Wong jeman 1930-an

SARATOK: Mayuh kenang manis enggau pait lebuh kitai agi mit menya kelebih agi ba menua endur kitai ada enggau besai. Genap utai ke nyadi nyengkaum nama orang suah nyadika jaku sema kitai lebuhka berandau.

Serak tu, Suara Sarawak mai kitai ngenang sebuah pasar lama diberi nama Pasar Kaki Wong ke diatu semina tinggal kenang aja adap ke menua dipegai Saratok.

Nampung jerita ari serak tubuh Angelia Bilun, iya nya ichit Saudagar Jeti, siku orang pegari nama, Iban Saratok lebuh jeman Rajah Brooke, ti ngembuan kaul rat enggau Rajah Vyner Brooke kelia.

Nitihka jerita, Saudagar Jeti tu orang Iban keterubah nanam getah ba Sarawak lalu tambah getah nya tadi diulih ari menua Sumatera. Kapal Saudagar Jeti tu suba diberi nama Sekunyir.

Dalam taun 1930-an ngagai 1940-an, lebuh ke nyadi pengajar ba Sekula Primari (SK) Nanga Drau, aki Angelia ngaga pemutus ngentapka pendiau diri ba menua Kaki Wong.

ICHIT SAUDAGAR JETI… Angelia Bilun

“Aki ichit kami ke benama Saudagar Jeti ngembuan mayuh tanah ba menua Kaki Wong. Ke bendar asal menua indai aku ari Kumpai.

“Aki ke ngadaka indai aku, ngiga endur berumah baru di Kaki Wong laban enda enggau orang berumah panjai di Kumpai.

“Tambah mega aki kami nya ngajar ba sekula ke besemak. Engka nya kebuah iya bisi ati deka ngentapka pendiau diri ditu.

“Kami berumah nyembuah, enda betampung enggau orang ba rumah panjai taja bisi rumah panjai besemak pasar baka ba Nanga Drau empu, Sungai Engkabang, Sebubu, Mapar enggau rumah panjai bukai besemak Kaki Wong empu,” ku iya ngepunka randau.

Nikalka pengingat agi mit suba ku Angelia, Pasar Kaki Wong dia semak endar ari langkau niang aki iya lalu sida endang bedarat aja enti deka ke pasar.

JALAI PENYAMBUNG… Jematan gantung nyambung tanah seberai pasar ngagai peranak rumah panjai.

“Ke bendar, kami tu jarang diau di menua tang agi mit suba sigi pulai belama ninting kemisi sekula tauka kemisi ngintu hari besai baka ngelama tu.

“Langkau kami suba iya nya langkau niang aki aku enda jauh ari kedai, bedarat aja enti deka nurun ngalu, ngelawa pasar kin.

“Agi suba nadai jalai darat baka diatu, peranak ke datai ari ulu sungai baka ari Ulu Krian endang sangkai ba Pasar Kaki Wong, bejualka getah, lada enggau semua asil kebun sida ngagai China ke bekedai dia.

“Pasar Kaki Wong tu tau dikumbai kitai kemaya hari palan penyangkai mensia mayuh, endur orang bejual enggau bebelika utai. Nya alai pasar tu chukup richah agi suba,” kenang iya.

Ku Angelia, semua peranak ke diau jauh ba ulu enggau entigis sungai suba endang betengahka jalai ai.

Tang diatu, menua udah jauh berubah laban udah datai jalai, nya alai sida ke datai ari menua Ulu Krian nadai mansa menua Kaki Wong agi, semua nengah jalai Simpang Ulu Krian.

TINGGAL KENANG… Sekeda gaya Pasar Kaki Wong ke diatu semina tinggal pengingat aja.

“Agi mit suba kami buyan amat enti betengahka jematan gantung ngelawa tanah seberai laban mansa pendam tuai ke ba kaki bukit.

“Nyelai amat ga sida ke tuai menya ngaga jalai enggai enda mansa tanah pendam. Baik agi jematan gantung ke baru diatu digaga kira jauh ari tanah pendam taja kitai agi ulih nimpai pendam lama ke bisi dia.

“Nyau ngenang sida ke datai ari ulu ti enda sempat mulaika diri, suah diau bemalam ba sadau kedai China ke bisi ba pasar dia.

“Kaul kitai Iban enggau China ba pasar maya nya sigi rat, begulai baka diri sekaban,” ku Angelia ngingatka utai ke nyadi ba Pasar Kaki Wong suba.

Siti ari pengingat pasal Klinik Pengerai Kaki Wong suba ku Angelia, utai ti ngasuh ati alit iya nya pemerani siku deresa ke diau kediri enggau ngaduka pengawa ba klinik nya.

“Tudah ga agi bujang maya nya, diau seiku-iku dia, klinik ga jauh ari genturung pendiau. Aku chukup muji pemerani nembiak nya ngereja pengawa.

“Gaya pendiau begunan klinik ukai baka diatu, dientak ba tengah dandang tanah ke besai, kediri-diri dalam babas. Bisi pun mulung dia, balat ngasuh ati buyan.

“Utai ga repa kiba-kanan kelimpah kampung tuai muak belakang. Diatu jauh manah pengudah diberi ngagai Sadia-Krian ngambika diintu, endur sida ngatur pengawa,” ku iya nerang.

Ngenang pasal ekonomi peranak Kaki Wong enggau kandang menua besemak endang baka pengawa dikemeran peranak rumah panjai bukai baka bumai, bekebun, berikan kelimpah ngasu ngiga pemakai enggau ke dijual.

Diatu pasar Kaki Wong udah nadai agi. Taja pasar lama nyau runtuh tang taba pasar agi ulih dipeda nyentuk seharitu, semina rumah kedai, jelatung enggau jematan lama suba nadai agi.

Diatu komiti Gerija St. Jerome, Kaki Wong ngena taba pasar tu niri ka Balai Mayuh Guna Gerija tauka dikumbai St. Jerome’s Chapel Hall.

Suara Sarawak