KUCHING: Pengelandik ba sesebengkah bidang deka meri penguntung laban ari pengelandik nya kitai deka ulih bejalaika bemacham pengawa lebih agi baka ngepunka pengawa dagang.
Enda ngira indu tauka lelaki, pengelandik tu ulih dikereja sereta dipejalaika enggau meruan nyema orang nya bisi ati deka ngereja pengawa.
Peneleba bejait siti ari pengelandik ti patut dikerembai kelebih agi raban indu di rumah panjai enggau di mengeri laban pengelandik tu siti ari makit dagang ti besai.
Ngemeranka pengelandik tu endang siti ari pekara ti dikerindu perintah laban kelimpah ulih nambahka penatai pemisi pengawa bejait mega ulih nyumanka ekonomi ruang bilik.
Kena 22 ngagai 25 March tu tadi, Kuansil Pemansang Ekonomi Sarawak (SEDC) bisi ngatur Program SEDC Skills Preneurs ba Balai Mensia Mayuh Sri Nyelong, Sarikei.
Raban ari Qumang Craft bisi nganjung tiga iku pengari ngulu program tu dikena ngansah peneleba enggau penemu bejait bala sida.
Program SEDC Skills Preneurs ti diatur empat hari berunggu tu dipelanja penuh SEDC lalu dipasuk 30 iku pesereta ke alai pengari ari Qumang Craft bisi siku lelaki enggau dua iku indu.
Lebuh dirandau Suara Sarawak, Margaret @ Kiok Bandok madahka program ti ngansah peneleba tu patut diatur suah agi ngagai genturung menua pesisir.
“Kelimpah bumai, kitai indu di rumah panjai mega patut ngerembaika pengelandik dalam mayuh bengkah pekara bukai baka bejait, nusuk marik, pengelandik nyumai, ngaga pau enggau ke bukai.
“Ari pengelandik tu meh kitai deka bulih buah runding bedagang, bejual enggau bedaja laban kitai udah bisi peneleba ba sesebangkah pengawa,” ku iya.
Kelimpah ari nya, Sudang Teggap ti mega ngarika Qumang Craft madahka diri betuah dipilih ngulu program nya.
“Kelimpah ngiri penemu, program tu mega ulih ngerapitka kaul enggau bansa kitai empu ti sama belajar.
“Ari nya kitai sama ulih besilih penemu ukai semina ba penau bejait, tang peneleba bukai ti nyangka bedau ditemu kitai sebedau tu.
“Aku ngarapka raban SEDC ngatur mayuh agi ngatur program baka tu dikena mantu peranak di menua pesisir.
Nangkan nya, pengari kepenudi Qumang Craft iya nya Harry Tayai Kaya madahka iya berasai temegah laban dipilih ngulu program nya kemari.
“Aku andalka raban SEDC mega ulih meri bantu baka mesin enggau keresa bukai awakka peneleba ti dipelajarka kami nya semampai bejalai ngujungka kami ulih muka dagang.
“Penelaba tu bisi endar muka peluang ekonomi ngagai aku lalu ulih mantu ngemanahka tikas pengidup kami sebilik.
“Ngarapka raban ari Qumang Craft seruran dikangau nyereta program baka tu belama laban tu meh entara chara perintah mantu peranak rumah panjai,” ku iya.
