RM21.5 juta kena nyukat tanah NCR di Sarawak

KUCHING: Menteri Kereja Raya, Baru Bian nyemetak madah agih belanja RM21.5 juta dikena nyukat tanah Adat Bansa Asal (NCR) di Sarawak kelebih agi nyukat pala tanah genap iku sida ke ngempu tanah nitih Seksyen 18 Kanun Tanah Sarawak.

Nya kebuah ku iya, nadai ubah bekenaka agih belanja nya nyengkaum nyukat kelingi di baruh Seksyen 6 Kanun Tanah Sarawak.

“Pekara tu udah diterang aku lebuh ngetuaika Aum Kaunsil Ngatur Pengawa Nengeri Sarawak (Bilangan 1 Tahun 2019) kena 18 Mac nyin tadi ke alai agih belanja RM21.5 juta tu deka dikena nyukat pala tanah individu di baruh Seksyen 18 lalu ukai dikena nyukat kelingi di baruh Seksyen 6 Kanun Tanah Sarawak,” ku iya ba penerang, kemari.

Kenu ku Baru, agih belanja nya sebagi ari RM40 juta ti diagih Perintah Besai Pakatan Harapan (PH) taun tu ungkup program khas ti nyelinting raban bumiputera Sarawak.

Berindik ari nya ku iya ti mega Chairman Parti Keadilan Rakyat (PKR) Sarawak, penetap penemu PH Sarawak ba isu bekaul enda berubah, ukai baka ti dikerembai ba media rama.

Beru ngelansa sentang pekara dikerembai ba media rama ke alai iya udah ngubah penemu deka nyukat kelingi tanah lalu ukai pala tanah individu di baruh Seksyen 18 Kanun Tanah Sarawak.

BARU BIAN