ARTIKEL

Sarawak andal ulih nyapai imuniti beraban

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

KUCHING: Lebuh menua napi penanggul kes ninting hari Covid-19 ti kala manggai 11,000, strategi Sarawak ngatur pengawa nuchuk dulu rejister dudi udah mantaika empas ti manah.

Kepala Menteri Datuk Patinggi Abang Johari Tun Openg madahka, chara nya ti dipejalaika bulan June tu tadi ungkup peranak menua pesisir bejalai enggau manah laban iya pechaya menua tu ulih nyapai imuniti beraban bulan Ogos ti deka datai.

“Naka diatu sepenyampau 1.5 juta rayat Sarawak udah nerima vaksin dos keterubah, ke alai sepenyampau 818,398 iku ari sida udah nembuka dua dos vaksin Covid-19.

“Tu mantaika strategi perintah amat beguna laban kitai meretika penanggul rayat menua pesisir ngulihka arus penyambung internet enggau ngena MySejahtera,” ku iya.

Abang Johari bejaku munyi nya ba aum pemberita pengudah ngelawa sekeda Palan Meri Vaksin (PPV) di Miri, kemari.

Dalam rikod sebedau tu, Abang Johari mega madahka chara nya dipejalaika ungkup ngelengkaska proses vaksinasyen laban menua deka nyapai imuniti beraban.

Kelimpah ari nya, iya madahka katil ti dikena ba wad unit sakit raya (ICU) enggau katil bagi pesakit Covid-19 di Bagi Menua Miri udah bisi nurun.

“Nya nunjukka orang udah bisi kurang tama ba ICU ke alai kitai nadai mega kusut runding pasal pekara ngena katil ba wad nya.

“Pia mega, katil ti diguna udah majak kurang. Nya mai reti orang ti tama ke Sepital Miri udah kurang enggau mai reti kes berampit Covid-19 ba bagi menua tu mega udah kurang,” ku iya.

Tandu Abang Johari, naka kemari bisi 238,772 dos keterubah diberi ngagai rayat di Miri.

“Penyampau tu sama enggau 72.5 peratus peranak ditu udah nerima vaksin, lalu 35 peratus tauka 114,634 iku udah tembu dua dos vaksin.

“Nya alai ba Miri kitai udah nyapai tagit lalu kitai melabaka penyampau penerima dos kedua deka majak nambah dalam beberapa minggu agi,” ku iya.

Ngelansa pasal program iya kemari, Abang Johari muji raban bekaul dalam ngelengkaska proses meri vaksin di menua tu.

“Kaul semua raban industri sereta kerejasama rat entara perintah, raban peribit enggau rayat Miri udah ngelengkaska proses vaksinasyen ditu.

“Tu penyulut ti manah, meri pengaga ati ngagai semua raban ti bekaul laban meri kerejasama ti manah ngagai nengeri dalam ngelaban pengerekai Covid-19,” ku iya.

ARAP MENUA JAMPAT SUMAN…. Abang Johari (empat kiba) begambar enggau raban terabai komuniti di PPV Miri, kemari. Sama bisi datai Sapit Kepala Menteri Datuk Amar Awang Tengah Ali Hasan (tiga kiba) enggau bala bukai.

BERITA LAIN

BERITA TERBARU

Projek naik taraf lima jalan di Meradong siap

BINTANGOR: Penduduk lima penempatan di Meradong kini menikmati kemudahan yang lebih selesa apabila pelaksanaan lima Projek Mesra Rakyat (PMR) membabitkan kerja baik pulih jalan raya