ARTIKEL

Ukir Kenyalang mai tuah ngagai Patricia Limau

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

KUCHING: Penyelai, pengalus enggau pemanah ukir kenyalang tangu ditengkebang Patricia Limau udah narit ati mensia mayuh enggau bala akim.

Patricia Limau, 40 taun, menggi gelar champion Pekit Tangu Online 2021 diatur Pemungkal CC Beauty, Cecelia Lagak enggau Pemungkal Keresa Kitai, Sangin Juat.

Ba pekit tangu tu, pemanah keranjai jari ditengkebang Patricia nyelai ari orang bukai ngujungka iya mujur bulih undi 239.50 peratus sereta mai gelar champion.

Indu ari Song tu mega deka mai pulai perais mata duit RM400, trofi ari Hellen Beauty Academy, Produk nganta CC Beauty enggau kantung wi ari Algasana Boutique.

Pemanah tangu ke ditengkebang ngena leka manik chura burak enggau chelum udah mai tuah ngagai Anita Assan, asal ari Penasu, Sibu bulih lumur dua sereta mai pulai perais mata duit RM300, Produk nganta CC Beauty enggau kantung wi ari Algasana Boutique.

CHAMPION… Patricia Limau bekenaka tangu ditengkebang iya empu.

Pia mega, pemekit benama Frankey Fiq asal ari Mapai, Kanowit bulih lumur tiga lalu mai pulai perais mata duit RM200, Produk nganta CC Beauty enggau kantung wi ari Algasana Boutique.

Lebuh dirandau, Cecelia madahka seduai iya Sangin Juat seati ngatur Pekit Tangu Online 2021 lalu tu pekit kedua diatur pengudah mujur ngatur Pekit Selampai 2021.

Ku iya, seduai nerima timbal ke chukup manah lebuh ngatur Pekit Selampai ke udah diatur apin lama ke udah.

Cecelia madahka sida mega deka ngatur pekit bukai dudi hari nyadika pelasar bala pedagang mandangka produk kraf jari sida.

Nambahka nya ku iya, batang tuju sida ngatur pekit tu ukai semina deka ngiga ukir ke nyelai tang keran deka mandangka produk keranjai jari ngambi dikelala orang bukai.

“Pengelandik nengkebang produk kraf jari kemaya hari ngenataika mayuh penguntung lalu tau mega nambahka penatai pemisi diri sebilik.

“Pekit tu dikena kami meransang mensia mayuh kelebih agi rebak biak ngambi sida rindu belajarka pengelandik asal baka tu lalu ngiga anak belanja kediri empu.

“Baka rebak biak diatu, ari sida ke meda media rama baka Facebook aja manah agi sida ngena peluang nya belajar enggau mantaika produk kraf sida lalu ulih nambahka penatai pemisi.

“Pekit tu dikena kami nyaup mandangka produk kraf bala pemekit, nadai ngira sekalika nya tangu nya ukir bebungai, kesulai, kenyalang enggau ke bukai.

CECELIA LAGAK

“Taja aku nadai pengelandik enggau pabu penemu sentang pengawa tu tang aku keran deka nyaup bansa kitai ngambi sida angkunka pengawa betusukka leka manik tu.

“Taja aku tu nemu agi ba pengawa ngaga produk nganta tang aku chukup temegah ati meda sida ke landik amat betusukka leka manik tu.

“Nyadi, aku ngarika bala akim dulu aku nusun sepuluh jari laban sekeda bala pemekit enda dipilih, enda disebut nama lalu kita tau nguji baru ba pekit bukai dudi hari laban alah tauka menang nya endang adat bepekit au,” ku Cecelia nerang.

Pemungkal begulai, Sangin Juat madahka iya chukup gaga laban pekit tangu tu nerima timbal ke chukup manah.

Ku iya, mayuh orang deka masuk pekit tu tang sida semina ulih milih 50 iku aja pemekit.

Sangin madah iya chukup rindu meda bekau enggau keranjai jari bala pemekit, endang manah magang.

“Gaga amat ati lebuh nerima mayuh penyereta tang minta ampun, kami semina ulih milih 50 iku pemekit aja, sinu ga ninga sida ke nanya nama kebuah enda dipilih tang nadai ku enggau, nyema bisi jereki manah kami deka ngatur baru pekit baka tu.

“Chukup rindu meda pemanah bekau enggau keranjai jari bansa kitai lalu pekit tu ukai semina ngulihka perais mata duit RM400.

SANGIN JUAT

“Baka bala pemekit tadi, nengah media rama kelebih agi Facebook tu mih peluang kitai mandangka pengelandik jari kitai Iban enggau ngelakuka produk diri.

“Pengawa tu pulaika pemanah enggau nambahka penatai pemisi ari kitai ke duduk dedunga aja ba rumah, manah agi mandangka keranjai jari diri.

“Kena meh Facebook tu sebagi ari chara kitai ngemansangka dagang kitai Iban laban kitai dekaka produk asal ari Sarawak tu ulih diangkat ngagai tikas ke tinggi agi dudi hari ba renggat menua enggau entarabansa.

“Aku arapka rebak baru bisi pengerindu enggau pengangkun pasal pengelandik asal baka tu,” ku Sangin nerang.

BERITA LAIN

2,000 belanda seraya ngintu rampa menua

KUCHING: Urung 2,000 penyereta ngulu program belanda pengasih besuluka jaku Run To Save Lives 4.0 ti belabuh ba mua Majlis Bandaraya Kuching Selatan (MBKS), ditu

BERITA TERBARU