10 Mei : Siti kes positif baru ari pelilih Serian

KUCHING: Pelilih Serian ngerikodka siti kes posiitif baru covid-19 di Sarawak sehari tu lalu ngujungka bisi 543 kes positif ba nengeri tu kenyau kes keterubah diripot kenaka 13 March 2020.

Sekretariat Komiti Penyangga Penusah Ngenyit Nengeri Sarawak (JPBNS) madah naka sehari tu mega, nadai kes positif baru diripotka nyadi ba pelilih menua bukai ba nengeri tu.

Berebak enggau nya, JPBNS madahka bisi 66.30 peratus kes positif ba nengeri tu udah ditemu gerai sereta dikemendarka pansut ari sepital.

Sehari tu, bisi 10 kes udah ditemu gerai sereta dikemendarka pansut ari sepital lalu semua kes nya diripotka ari Sepital Besai Sarawak (SGH).

Nangkan nya, kes Pesakit Agi Dipatau (PUI) dirikodka bisi 143 kes lalu 69 kes PUI ba nengeri tu agi nganti pemutus ari makmal.

Ba lansa ke sama, JPBNS madahka bisi 31 pelilih menua tu udah dikategorika zon gadung, lapan zon kuning ti nyengkaum Samarahan, Tebedu, Lundu, Sibu, Bau, Serian, Bintulu enggau Limbang lalu Kuching mengkang ba zon mirah.