10 nembiak Unimas ngansah pengelandik nengkebang

KUCHING: Program Kursi STIDC nagit 120 iku nembiak landik nengkebang produk kayu di menua Sarawak manggai taun 2030.

Mandal Menijar Besai Pemansang Dagang Kayu Sarawak (STIDC) Dayang Nena Abang Bruce madah STIDC enggau Universiti Malaysia Sarawak (Unimas) bekerejasama enggau Institut Teknologi Bandung, Indonesia udah nganjung 10 nembiak Unimas belajarka penau enggau penemu nengkebang produk kayu ba menua nya.

“Tu program timpuh panjai STIDC dikena numbuhka pemansang industri kayu laban kitai nagit datai ba taun 2030 bisi 120 iku nembiak landik nengkebang produk kayu di Sarawak.

“Ba program tu sida dipatih ukai semina nengkebang produk kayu tang nyengkaum dagang produk kayu ba menua tu ngambika ulih diangkat ngagai tikas entarabansa tauka dunya,” ku iya nambah.

Dayang Nena mansutka jaku tu rambau aum pemberita ba Begunan Wisma Sumber Alam ditu tadi.

Ku iya, kerejasama program tu kenyau 2012 tang ba 2018 enggau taun tu, baru sida nganjung nembiak ari menua Sarawak belajar din.

“Rambau Sarawak Design Conference & Expo 2019 keterubah ila kitai deka meda ‘prototype’ keterubah ditengkebang bala nembiak ti ngulu program nya lalu sida mega ulih bekunsika pengelandik dipelajar din.

“Kitai endang ngemeratka produk kayu menua tu empu dikena ngerembaika industri kayu sereta meransang ngansah pengelandik nengkebang,” tandu iya.

Produk kayu ulih diangkat nyadi dagang laban nerima peminta tinggi ba makit entarabansa.

Sarawak Timber & SMEs Expo 2019 deka diisi enggau Sarawak Design Conference & Expo 2019 keterubah deka digulu enam iku pengelicha ari Malaysia enggau Indonesia sereta nembiak Program Kursi Pusaka bekunsika penerang pasal pemanah produk ti ditempa ari kayu.

Aum besai nya diatur enda bebayar lalu nagit lebih 120 iku mensia mayuh ti angkunka pengawa nengkebang produk kayu sereta sida ti endang udah ngaul diri ba dagang enggau industri kayu tu.

Dayang Nena Abang Bruce.

Suara Sarawak