10 tanya udah disedia MP Sibuti

KUCHING: Kaban Parlimen (MP) Sibuti Lukanisman Awang Sauni udah nyendiaka 10 tanya ti deka dipadahka dalam Aum Parilmen sehari tu (13 Julai).

Ku iya, mayuh tanya nya endang bekaul enggau isu pelajar pengudah Covid-19, ekonomi enggau pekara pemansang pelilih.

“Dalam jurai Jaku Diraja, aku udah konsisten deka bejaku pasal pemansang sekula repuk, program orang biak pengudah Covid-19, servis pengerai menua pesisir, isu bekaul enggau Petronas enggau Reformasyen Parlimen.

“Aku agi ngasaika taja bisi ubah ba perintah menua, Reformasyen Parlimen patut diteruska taja bisi ubah ti besai dalam pengawa milih ‘Select Committee’ ba parlimen,” ku iya lebuh ditanya Suara Sarawak, kemari.

Tandu iya, parlimen mega meseti rasional dalam pengawa ngagihka agih belanja ngagai Kaban Parlimen Perintah enggau piak penyakal.

“Ambika chunto, kaban parlimen meseti diberi agih belanja dikena nguruska palan servis enggau mayar pemesai pemansik,” ku iya.

Nangkan nya, bekaul enggau diri iya empu udah besedia ke enda nyema piak penyakal bisi ngaga resolusyen ngenyit iya madahka diri udah besedia.

“Bagi resolusyen ngenyit aku udah besedia, semua piak deka meratika pejalai kaban parlimen nyema bisi resolusyen enggau pengawa ngundi dipejalaika.

“Aku ngarapka aum kesekali tu enda panjai tauka ngujungka laya ti semina muai jam enggau sengaja ngasuh ringat.

“Kaban parlimen meseti meri fokus sentang pekara nyumanka menua pengudah Covid-19 enggau ekonomi rayat laban nya pekara ti lebih beguna,” ku iya.

Bekaul enggau isu sapa ti engkeman nyadi Menteri Besai iya nyemetak madahka pekara nya ukai dalam fokus laban Gempung Parti Sarawak (GPS) udah ngaga pemutus meri sukung ngagai Menteri Besai Tan Sri Muhyiddin Yassin.

“Sukung tu mega diberi atas pelasar menua patut ‘bejalai ke mua’ enggau enda ulih ngelakka krisis politik kelalu lama pengudah Menteri Besai sebedau tu badu ngenyit,” ku iya.

Iya madahka, Perintah GPS deka tan enggau agenda pemadu beguna Sarawak tauka ‘Sarawak First’.

“Sarawak bisi hak minta pemansang ti patut ngagai bakih ti megai Perintah Besai.

“Nadai isu GPS enda bemunyi laban aum parlimen ila (sehari tu) semina sesyen saut tanya ti dipunka Kaban Parlimen Kota Samarahan Rubiah Wang.

“Aku empu mega deka ngambi bagi dalam sesi belaban penemu tanya nya ila (sehari tu),” ku iya.