100 iku positif Covid-19 di Bintulu nadai temu dini adres

BINTULU: Lebih 100 iku orang positif Covid-19 di Bintulu entara 12 April ngagai 21 April tu tadi bedau ulih giga tauka dikangau laban sida meri penerang bula.

Kaban Parlimen Bintulu Datuk Sri Tiong King Sing madah staf Sepital Bintulu agi enda ulih nganggauka sida tu ungkup pengawa kuarantin tauka diperubat laban adres enggau lumur telefon sida nya bula.

Nya alai, iya meri tangkan ngagai raban orang ke bekaul nya patut lengkas nganjung diri ngagai unit emejensi Sepital Bintulu dalam timpuh 24 jam, sida ulih ditangkap enggau dibai ngagai kort laban ngelanggar SOP digaga raban polis.

“Barang sapa ti meri penerang bula enggau ngasuh raban bekuasa saru mesti ‘ngesan’ tanggung pengawa diri nyema sida diteritka atur undang-undang.

“Nya alai, mensia mayuh mesti bejalaika tanggung pengawa sida meri nama ngagai raban penerit adat enti nemu orang ke bekaul nya.

Pedagang enggau pengaji ke ditemu ngelanggar atur tu mega deka diteritka atur undang-undang,” ku iya nengah sebengkah penerang kemari.

Bekaul isu ke sama, King Sing madah agi bisi serikat enggau pedagang nguji neruska operasyen enggau ngasuh pengereja pengawa sida nganjung penerang bula enti ditemu nyadi bakih kes positif.

Iya madah pansik tetemuka sekeda supermakit besekungkul enggau pengereja pengawa sida madamka rikod syif gawa enti bisi bakih sida positif Covid-19.

Seagi semua raban nadai mereti enggau meri kerejasama nitihka SOP seagi nya pengawa ngempang jalai tu enda badu,” ku iya.

Suara Sarawak