KUCHING : Semua pupu bansa di Sarawak diperansang bela ngambi bagi ba pengawa nempa World Guinness Record nengah pengawa ngajat ti deka dipasuk 1,000 iku peranak nengeri tu.

Nitihka penerang ari Chairman Pengatur Hari Sarawak Merdeka Ke-10 722, Anthony David program ngajat bebala mayuh tu deka diatur ba Ruang Tebuka Orad (Bung Orad), Grogo, Bau.

Dulu ari nya, iya madahka perambu ngatur pengawa mandangka main asal ba Pasar Bau dikinsil ketegal permit tang ditukar ngagai palan baru di Bung Orad.

Ku iya, Bung Orad bepalan urung 3.5 batu ari Pasar Bau lalu program tu ila deka berengkah pukul 9.30 pagi nyentuk 1.30 ngalih hari.

“Kami minta ampun ngagai nasionalisme enggau peminta main asal laban Pengawa Bebala Mayuh Mandangka Main Asal 722 di Pasar Bau dikinsil.

Nangkan ke nya, Anthony meransang mensia mayuh bela sampal datai enggau ngerichahka pengerami tu seraya beratika main asal ti deka dipandangka bansa Bidayuh, Iban, China enggau Bisaya.

Kelimpah ari nya, ku iya program nya mega deka dirichahka enggau pengawa nyirap kek gerasi k-10 722, pengawa ngelepauka burung achang sereta mandangka bemacham tanda asal ari pupu bansa di Sarawak.

“Sapit Kepala Menteri Sabah, Datuk Seri Panglima Dr Jeffery Kitingan udah madah diri deka datai ngulu hari besejarah tu ila,” ku iya.