1,000 iti pengerara api ungkup rumah panjai

KUCHING: Bisi 1,000 iti perengka pengerara api diterima Opis Bomba enggau Penyah Penusah (JBPM) Sarawak Tabuan Jaya ngambika ulih disadung ngagai rumah panjai di nengeri tu.

Menteri Pengawa Berumah enggau Kaunsil Kandang Menua Zuraida Kamaruddin madahka agih perengka pengerara api tu diberi ngambika ulih ngurang penyadi penusah angus di Sarawak kelebih agi di rumah panjai.

“Taja penyampau perengka pengerara api tu bedau ulih tetapika pemayuh rumah panjai di Sarawak urung 4,000 buah tang kitai ngarapka tating pengawa sida bomba ulih lempung.

“Pemeri perengka pengerara api tu mega diberi ngambika sida di rumah panjai ulih nyeliah, ngurang sereta ngembuan penyedar sentang penusah angus laban di Sarawak penusah angus tu nyadi bemusim,” ku iya.

Zuraida bejaku munyi nya ba Pengerami nyuaka Perengka Pemadam Api di JBPM Tabuan Jaya ditu, kemari.

UNGKUP RUMAH PANJAI…Zuraida Kamaruddin (dua kanan) nyuaka replika perengka pengerara api ngagai Khirudin Drahman @ Hussaini ba Pengerami nyuaka Perengka Pemadam Api di JBPM Tabuan Jaya ditu, kemari.-Gambar Nadim Bokhari

Ku iya, sida diatu dalam perambu ngiga sereta mansik perengka pengerara api ti bukai baka bilun terebai ti moden sereta jauh lebih lengkas dikena ngesah penusah angus.

“Jemah ila kitai deka mansik palan ti suah tauka jampat angus ngambika nyamai endur kitai ngadang penusah tu nyadi.

“Pia mega, ngarapka perengka pemadam api ti diberi tu dikena enggau manah sereta ulih mantu sida di rumah panjai madamka api ba renggat tumu,” ku iya.

Dulu ari nya, Direktor JBPM Sarawak PkPJB Khirudin Drahman @ Hussaini madahka perengka pemadam api mayuh diberi sida ngagai rumah panjai ngambika raban di rumah panjai landik ngena perengka nya maya dituntung penusah angus.

“Urung 3,977 buah rumah panjai di Sarawak ti ngembuan struktur kayu enda tan ke alai kami magi perengka pengerara api nengah tuai rumah sereta ngajar sida ngena perengka nya.

“Tu nyata mujur lebuh 26 Julai apin lama di Rumah Panjai Long Ikam Baram angus tang ulih dipadamka sida ngena semilan unit perengka pemadam api ti disediaka kami.

“Enggau pemujur tu semina tiga buah pintu aja angus diserarai api lalu 74 buah pintu ke bukai mujur diselamatka,” ku iya seraya madah rumah panjai nya diwan 1,000 iku peranak rumah panjai.

Tambah Khirudin, sida mega bisi ngatur 638 tim bomba komuniti ba genturung rumah panjai dikena madamka api tumu maya penusah angus nyadi.

“Tim tu bisi urung 6,138 iku raban lalu kami andalka tim tu ila manggai 700 buah.

“Tim bomba komuniti tu dipelanja Petronas beungkus RM1 juta tang belanja nya dijaga perintah nengeri,” ku iya.

Sama bisi datai Penolong Direktor Bagi Operasyen JBPM Sarawak PgKB l Tiong Ling Hii.

Suara Sarawak