11 ex-MP PKR gempuru makai lemai demalam

KUALA LUMPUR: Semua 11 Kaban Parlimen (MP) PKR ti ningkilka diri ari parti ngatur randau seraya makai lemai ba sebuah hotel di Damansara, demalam.

Nitihka penerang ari orang ti bisi kaul rat enggau siku MP ari Sarawak, gempuru makai lemai berengkah urung pukul 8 malam lalu tembu nyau deka tengah malam.

“Semua sida betubuh 11 bisi datai magang tang enda seretai penatai. Bisi datai enggau pulai, tu semina gempuru makai lemai aja,” ku penerang nya.

Sida tu nyengkaum empat menteri penuh – Datuk Seri Mohamed Azmin Ali (Gombak), Zuraida Kamaruddin (Ampang), Datuk Saifuddin Abdullah (Indera Mahkota) enggau Baru Bian (Selangau).

MP bukai iya nya Datuk Kamarudin Jaffar (Bandar Tun Razak), Datuk Mansor Othman (Nibong Tebal), Datuk Rashid Hasnon (Batu Pahat), Datuk Seri Santhara Kumar (Segamat), Ali Biju (Saratok), Willie Mongin (Puncak Borneo) enggau Jonathan Yasin (Ranau).

PKR ningkilka Azmin enggau Zuraida sebedau seduai madahka diri pansut ari parti.

Raban pemberita mujur ngerandau sekeda ex-MP PKR ba luar endur gempuru makai lemai ke diatur betambit pintu tang puntan ngulihka sebarang penerang ari sida. – BERNAMA

Suara Sarawak