KUCHING: Seraban Orang Asal nandu baru turai sejarah ngelawa lalu berandau betunga mua enggau dua Menteri Kabinet Sarawak ngena sirat ti kala ditempa dalam taun 1957 suba.
Chairman Serakup Tajai Sarawak, Themotty Jagak madah, sida betubuh 11 iku nyengkaum iya empu udah bejadika langgur pejalai nya enggau ati ransing laban mai identiti tauka kelai bansa asal di menua tu.
Ku iya, pejalai sida sehari sebuat nya meri reti chukup besai kelebih agi ba pengawa nyagu enggau ngetanka penulin Adat Asal enggau Ngepan Asal raban bansa Iban.
“Aku chukup temegah nyadi sebagi ari raban ti diberi peluang niti nali Adat Asal enggau ngerasukka Ngepan Asal kitai Iban laban ba aku empu, tu mih pengelala bansa ti ngasuh orang ngelala enggau bebasaka bansa kitai.
“Tu mega setipak enggau tuju pejalai kami ti dekaka orang ngelala enggau ngaku Adat Asal enggau Ngepan Asal ngambi ulih diibun enggau dijaga nengah pengawa ti meruan ngambi enda mudah lenyau diseruyut pemansang,” ku iya.
Themotty nibarka penemu nya pengudah tembu randau begulai enggau Menteri Dagang Temuai, Industri Kreatif enggau Seni Pemerindang, Datuk Seri Abdul Karim Rahman Hamzah enggau Sapit Menteri iya, Datuk Snowdan Lawan ba Opis Begunan Masja Baru ditu, kemari.
Iya madah baru, raban Tajai Sarawak nyadi serakup terubah mai bala mayuh ngena sirat rambau Simposium Ngepan Iban di Betong ti diatur dalam pun taun 2019 suba.
Betambah manis ku iya, pengawa sida nya tadi udah nerima puji ari raban pemansik enggau sida ti anda ba perengka Ngepan Asal Iban ari Universiti Pendidikan Sultan Idris (UPSI).
“Jaku puji nya ti nyadika peransang bala kami ransing agi nyagu enggau ngetanka Adat Asal enggau Ngepan Asal kitai Iban lalu ari tu mega kami teulihka runding ngena sirat ba pejalai kami sehari tu (kemari).
“Lebih 30 taun ke udah, seraban Orang Asal ari Sarawak ti ngena sirat tauka ngerasukka Ngepan Asal Lelaki mega kala ngatur pejalai lalu betemu enggau bala Menteri Sarawak.
“Lalu pagi tu, 19 April 2022, sekali agi sejarah nya ditandu lalu kami temegah ati ulih ngereja pengawa ti meri pemaik ngagai bansa Orang Asal di Tanah Kenyalang,” tandu Themotty.
Berita penuh Ruai 1 pagila
