11 nembiak beduan dilepas enggau jamin polis

PADAWAN: Sepenyampau 11 nembiak Sekula Sekondari (SM) Sains Kuching ti ditangkap laban beduan tiga nembiak Pom 2, dilepas kena Hari Dua tu tadi.

Ketuai Polis Pelilih Padawan Superintendan Aidil Bolhassan madah, semua sida dilepas enggau jamin ari polis.

“Sida mega ngaku bisi nyamah bala nembiak ngena jari enggau kaki, semina siku aja ti ngemataka pengawa nya,” ku iya meri penerang, ditu tadi.

Ku Aidil, semua nembiak nya ditangkap ba sekula urung pukul 11 pagi Hari Dua enggau dibai ngagai Opis Polis Kota Sentosa ngambi ngerikod penerang sida.

Nambahka nya ku iya, empat iku ari sida nya nembiak Pom Lima, siku nembiak Pom Empat enggau enam iku nembiak Pom Tiga.

Ba penusah ti nyadi Hari Minggu tu tadi, nembiak nya udah mukut tiga iku nembiak Pom Dua ba buding ngujungka sida tu bisi abi nemaram ba semua tubuh.

Pagi siti, siku ari sida ti dikenduan madah ngagai apai iya pasal pengawa tu lalu berumban ngeripot ngagai polis sebedau nerima ripot ari bala dua iku nembiak agi.

Aidil madah, asil diperesa lutur ngenukuka tiga iku nembiak nya bisi abi nemaram ba semua tubuh.

Suara Sarawak