115 iku volunteer udah ngujika vaksin Covid-19 di Malaysia

MERSING: Sepenyampau 115 iku volunteer udah dituchuk vaksin ungkup pansik klinikal renggat ketiga Covid-19 ari semilan buah sepital ba lima nengeri naka tu, pia ku Menteri Pengerai Datuk Seri Dr Adham Baba.

Iya madahka sida nya raban keterubah ari 3,000 iku volunteer beumur entara 18 taun enggau tuai ari nya sereta nitihka atur ti udah ditetapka.

Ku Adham, sepital ti nyadi palan pansik dipatau Institut Pansik Klinik tu iya nya Sepital Ampang enggau Sepital Sungai Buloh di Selangor sereta Sepital Sultanah Bahiyah enggau Sepital Sultan Abdul Halim di Kedah.

Pia mega ku iya, Sepital Pulau Pinang enggau Sepital Seberang Jaya di Pulau Pinang, Sepital Raja Permaisuri Bainun enggau Sepital Taiping di Perak sereta Sepital Besai Sarawak (SGH).

“Program baru berengkah dipejalai tiga hari ke udah pengudah Menteri Besai madahka haribulan (pansik) nya ujung bulan tu ti deka dipejalai pengelama 13 bulan.

“Pengawa matau mega deka dipejalai ngambi beratika pengasi, pengelikun enggau kualiti vaksin ti dipansik nya,” terang iya.

Adham mansutka jaku nya ngagai pemberita pengudah ngabas siku anak mit ditepan penyakit ‘cystic hygroma’ di Kampung Semaloi, Endau, ditu ensanus.

Dr Adham madahka volunteer bukai disadang dituchuk vaksin chara berenggat ba timpuh empat minggu.

Pansik klinikal renggat ketiga nya kerejasama entara Malaysia enggau China nengah Inistitut Biologi Perubat Akademi Sains Perubat China. — BERNAMA

Suara Sarawak