12 indu Vietnam nyual diri ditan

MIRI: Sepenyampau 12 iku indu peranak menua luar dipelaba ngereja ulah enda menuku udah ditan polis ba sebuah kedai urut di Jalai Merpati ditu, Hari Dua tu tadi.

Seraban polis ari Bagi Pekara Pansik Penyalah Daerah (BSJD) Miri bejalaika operasyen ngenyit pengudah ngelila enggau penerang diterima pasal ulah orang ba kedai urut nya.

Operasyen ngenyit berengkah ari pukul 11 malam nya udah ngetan siku lelaki, 25 taun, peranak menua tu dipelaba nyaga kedai nya, ngambika dipansik silik.

Sida mujur ngetan 12 iku peranak Vietnam dipelaba dipilih ngereja ulah enda menuku nya.

Nitihka penerang, pansik tumu operasyen ngelila dipejalai sebedau operasyen ngenyit madahka semua saspek nyual diri enggau bayar ti bebida iya nya entara RM238 ngagai RM730 ungkup pengawa beleman.

Berebak enggau operasyen nya, piak polis mega ngerampas sekeda barang baka tiga kondom, empat kutak tisu enggau mata duit penyampau RM1278 dipelaba asil diulih ari pengawa enda menuku nya.

Semua saspek ditan beumur entara 21 ngagai 33 taun lalu udah direman berengkah Hari Tiga tu tadi nyentuk 13 Disember.

Kes dipansik nitihka Seksyen 372B Kanun Keseksaan, Seksyen 6 (1)(c) Akta Imigresen 1963, enggau peraturan 39B Peraturan-Peraturan Imigresen 1963.

Suara Sarawak