12 pendam Orang Asli deka disengkubang baru

GUA MUSANG: Opis Menteri Pengerai nengah bantu ari ejensi ti bekaul deka nyengkubang baru pendam 12 iku Orang Asli ti mati luluh lempuang tauka pneumonia di Kampung Kuala Koh ngambika nemu kebuah pemati sida.

Menteri iya, Datuk Seri Dr Dzulkefly Ahmad madah, pekara tu beguna amat ngambika pengawa buntas pansik ulih dipejalaika ba bangkai tu kelimpah nemu penyakit enggau kebuah ke amat pasal pemati sida.

“Taja pia, pekara tu bepanggai ba polis ke deka ngerumbak pendam sida ti ditanam nitihka adat laban kitai udah bejalaika bedah pansik ba dua bangkai ti ditanam ngena chara Islam.

“Kitai mega udah bejalaika pansik pasal pekara tu ba Kampung Kuala Koh tang pendam nya enda ditemu laban ditumbak ba sebarang endur, sida pan sama enda nemu lebuh ditanya,” ku iya pengudah ninga licha enggau ngabas pesakit orang asli ti diperubat di Sepital Gua Musang (HGM), ditu sehari tu.

Urung 50 iku Orang Asli Bateq ti agi nerima perubat ba tiga buah sepital nengeri tu nyengkaum 37 iku di HGM, 12 iku di Sepital Kuala Krai (HKK) lalu siku di Unit Sakit Raya (ICU) di Sepital Raja Perempuan Zainab II (HRPZII), Kota Bharu.

Nangkanka nya, Dzulkefly mega meri jaku lalau ngagai mensia mayuh ngambi enda dampih sitak kampung nya laban penyakit nya mudah berampit.

Ngelansa pekara ti sama, iya madahka piak sida begunaka awak dikena mansik kebuah penyakit nya nyadi ngagai komuniti orang asli ti ngasuh nabanka nyawa.

“Kitai mega begunaka awak dikena ngelala bansa virus tauka bakteria dalam penyakit tu. Kitai pechaya bansa virus tu ulih ditemu enda lama agi,” ku iya.

Dr Dzulkefly madah, piak sida mantah pekara madahka pemati dua iku peranak orang asli nya ketegal penyakit kemi chit tauka Tuberculosis (TB).

AUM PEMBERITA…Datuk Seri Dr Dzulkefly Ahmad (duduk kiba) begulai enggau bala bukai rambau aum pemberita bekaul enggau pengawa deka nyidi baru pendam 12 iku Orang Asli ke mati ketegal luluh lempuang di Kampung Kuala Koh, Kelantan.